"Nikol Paşinyanın hakimiyyətə gəlməsində ona açıq dəstək göstərən, indi də ona, demək olar ki, loyal yanaşan "1in.am" saytına baxıram, orada Minsk qrupu həmsədrlərinin Dağlıq Qarabağ danışıqlarıyla bağlı son açıqlamalarını baş nazirlərini güncə sıxmaq kimi dəyərləndirirlər. Əslində təkcə baş nazirləri yox, bütövlükdə Ermənistan çoxdan küncdədir. Onları güncə sıxışdıran Minsk qrupu həmsədrləri deyil, yeritdikləri işğalçılıq siyasəti, bunun da qarşılığında Azərbaycanın gördüyü tədbirlərdir”.
Bu sözləri "Sherg.az”a millət vəkili Sahib Alıyev həmsədrlərin son bəyanatını şərh edərkən söyləyib.
Həmsədr dövlətlərə gəlincə, parlamentarinin sözlərinə görə, İran kimi onlar da həmişə Ermənistanı küncə dirəmək nədir, əksinə küncdən çıxarmağa çalışıblar ki, bunu da hamı bilir:
"Elə son açıqlamalarında da məqsəd budur. Paşinyanın səsləndirdiyi populist və maksimalist fikirlərin haylar üçün ağır nəticələrə aparıb çıxaracağı proqnozlaşdırldığından onu ayıltmağa çalışırlar.
Baxın, bu gün Azərbaycanın Silahlı Qüvvələri Ali Baş Komandan İlham Əliyevin əmriylə geniş təlimlər başladı.
Təlimlərdə qarşıya qoyulan vəzifələrə diqqət yetirdikdə burada "Blitzkrieg" hazırlığının getdiyi açıq-aydın görünür. Həmsədr dövlətlər də gözəl bilirlər ki, Ermənistanın yeni format oyunu ortaya atmaqla substantiv danışıqlardan qaçmasının alternativi budur. Cəbhə isə heç də Nikol Paşinyanın özünü sudakı balıq kimi hiss etdiyi mitinq meydanı deyil. Yayılım atəşi və raket zərbələri altında onun populist çıxışları eşidilməz olacaq, eşidilsə belə, dinləyən tapılmayacaq.
Ona görə də Minsk qrupu həmsədrləri son açıqlamalarıyla bu populist və maksimalist haylarına deyirlər ki, ağıllı ol, ölkənin potensialına uyğun hərəkət et, fors-majorla üzləşmək istəmirsənsə, gəl danışıqlar stolu arxasında əyləş”.
Qeyd edək ki, ATƏT-in Minsk Qrupunun həmsədrləri 1 mart tarixli bəyanatlarında Azərbaycan Prezidenti İlham Əliyev və Ermənistan baş naziri Nikol Paşinyanın yaxın zamanda görüşmək qərarını alqışlayırlar. Bəyanatda tərəflər mövcud vəziyyətdə dəyişiklik yarada biləcək açıqlamalardan və hərəkətlərdən, gələcək danışıqlar üçün şərtlər irəli sürməkdən və digər tərəfin razılığı olmadan formata dəyişikliklər tələb etməkdən və aktiv hərbi döyüşləri bərpa etmək çağırışından yayınmağa səslənib. Həmsədrlər münaqişənin ədalətli və davamlı həllinin Helsinki Yekun Aktının əsas prinsipləri olduğunu bir daha qeyd edərək vurğulayıblar ki, bu prinsiplər və elementlər münaqişənin ədalətli və davamlı həlli üçün bünövrə kimi qəbul edilməlidir.
Ayyət Əhməd
