"Mənzil istismar sahələri əslində Mənzil Məcəlləsində nəzərdə tutulmayan strukturlardır”.
Bunu "Sherg.az”a Vətəndaşların Əmək Hüquqlarını Müdafiə Liqası İcraiyyə Komitəsinin sədri Sahib Məmmədov söyləyib.
O qeyd edib ki, "JEK”ləri başqa idarəetmə formaları ilə əvəz etmək heç də həmişə alınmır:
"Mənzillərin idarəetmə formaları müxtəlifdir. Birincisi, Mənzil Mülkiyyətçilərinin Müştərək Cəmiyyətidir(MMC). İkincisi, idarəedici təşkilat tərəfindən və nəhayət birgə mülkiyyət sahiblərinin yaratdığı müəssisə tərəfindən idarə olunur. "JEK”lər əslində de-fakto idarəedici təşkilat rolunu oynayır. İdarəedici təşkilatı mənzil mülkiyyətçiləri özü müəyyən etməlidir.
Mənzil tikinti kooperativlərin tikdiyi binalarda mülkiyyətçilərin icazəsi olmadan MMC yaradır, idarə edirlər. Halbuki proses mülkiyyətçilərin icazəsi ilə aparılmalıdır."JEK”ləri başqa idarəetmə sistemi ilə əvəz etməyə mülkiyyətçilər hazırdırmı? Əhalinin bu məsələdə passivliyi var. Bina mülkiyyətçiləri yığışmalı, müəssisə yaratmalı, hüquqi şəxs kimi onu qeydiyyatdan keçirməlidirlər. Bu zaman anlaşılmazlıqlar yaranacaq.
Sakinlərdən bəziləri ödənişi etməyəcək, bəziləri balkon çıxaracaq, blokda şkaf qoyacaq və s. Yeni tikilən binalarda da eyni vəziyyət olacaq. Nəzarəti bir azca zəiflədən kimi əhali ümumi mülkiyyətdə olan yerləri zəbt etməyə başlayacaq. Bu formalaşmış neqativ mədəniyyətdir.
"JEK”ləri bir qərarla ləğv etmək mümkün deyil. Hələlik bunu əvəz edəcək struktur düşünülməyib. Ona görə, məsələ açıq qalıb”.
Qeyd edək ki, bir müddət əvvəl mətbuatda "JEK” adlandırılan mənzil istismar sahələrinin ləğv ediləcəyi, bina sakinlərindən ibarət struktur yaradılacağı barədə məlumatlar dərc edilmişdi.
Aysel Aslan
