Parlamentin yaz sessiyasının ilk iclasında millət vəkili Qüdrət Həsənquliyev Vəkillər Kollegiyasına üzvlüklə bağlı imtahan balının aşağı salınmasını təklif edib. Onun sözlərinə görə, vəkilliyə keçid balı 60 baldan 50-yə endirilsə, xeyli sayda yeni üzvlər Kollegiyaya seçilə bilər.
Deputat bölgələrimizdə vəkil çatışmazlığı məsələsinə də toxunub: "Azərbaycanda hər 100 nəfərə 8 vəkil düşür. Bizim elə rayonlar var ki, orda 1 hakim var, amma vəkil yoxdur. Elə etməliyik ki, hər rayonda heç olmasa, 3 hakim, 4-5 vəkil olsun”.
Parlamentin vitse-spikeri Ziyafət Əsgərov isə Vəkillər Kollegiyasına qəbulda keçid balının aşağı salınması təklifinə etiraz edib:
"Keçid ballarını 60-dan 50-yə endirmək doğru deyil. Sonra da deyəcəklər bunu yenə endirin, 40 bal olsun. Əgər hüquqşünas 60 balı toplaya bilmirsə, bu, qeyri-ciddi məsələdir”.
Maraqlıdır, keçid balları aşağı salınacağı təqdirdə bölgələrimizdəki vəkil çatışmazlığı aradan qalxacaq? Ümumiyyətlə, balların aşağı salınmasına ehtiyac varmı?
Keçid ballarının aşağı salınması ilə razılaşmadığını deyən hüquqşünas İradə Cavadova "Şərq”ə bildirib ki, qanunvericilikdə insanlara yüksək keyfiyyətli hüquqi yardımın göstərilməsi əsas məsələlərdən biridir. Ballar aşağı salınacağı təqdirdə keyfiyyətli hüquqi yardımın olması mümkün deyil:
"Bu il Kollegiyaya üzv olmaq istəyən vəkillərə müəyyən şərait yaradılıb. Əvvəlki imtahanlarda məntiqlə bağlı suallar var idi və bu suallar daha çox riyaziyyata aid olan məsələləri əks etdirirdi. Vəkil namizədlər bundan şikayətlənirdilər. Lakin bu il həmin çətinliklər aradan qaldırılıb. Düşünürəm ki, indiki nəticələr uğurlu olub. Əvvəlki illərdə keçirilən imtahanlara baxdıqda səviyyənin çox aşağı olduğu görünür. Nəzərə alsaq ki, may ayında yenidən imtahanlar keçiriləcək. Yəqin ki, xeyli sayda hüquqşünas sənədlərini təqdim edəcəklər. Onların yarısı keçid balını toplasa, vəkillərin sayının artmasını müşahidə edə bilərik. Süni surətdə vəkil sayının artırılması keyfiyyət baxımından səmərəli deyil. Bizə savadlı, öz işini bilən kadrlar lazımdır. Yoxsa, sadəcə vəkil keçsin deyə, 10 min nəfər bal toplasın və onların əksəriyyəti savadsız olsun. Bu zaman vəkilliyin nüfuzu aşağı düşər. Məncə, keçid balının 60-dan aşağı salınması müsbət nəticə verməyəcək”.
Yeganə Bayramova
