Rus ordusunun Ukraynadakı separatçılarla birlikdə Debaltsevo rayonunu ələ keçirməsi yeni bir situasiya formalaşdırıb. Debaltsevonu ələ keçirməklə öz niyyətində nə qədər prinsipial olduğunu ortaya qoyan Rusiya həm hərbi, həm də psixoloji baxımdan daha aşkar üstünlüyə yiyələnib.
Ekspertlər hesab edir ki, Debaltsevonun itirilməsi Ukraynanın öz ərazi bütövlüyünü təmin edəcəyi ilə bağlı gözləntilərin üstündən xətt çəkib. Politoloqların fikrincə, bundan sonra Rusiyanın Ukrayna münaqişəsi məsələsində əsas söz sahibi olacağı ehtimalı olduqca yüksəkdir. Amma Kremldən verilən açıqlamada deyilib ki, separatçılar Rusiyanın nəzarətindən çıxıb və yaşayış məntəqələri rus ordusunun iştirakı olmadan zəbt edilib.
Məsələyə münasibət bildirən sabiq dövlət müşaviri, politoloq Vəfa Quluzadə Debaltsevonun işğalının Rusiyaya strateji baxımdan ciddi üstünlüklər qazandırdığını bildirib. Bundan başqa, politoloq hesab edir ki, separatçıların, guya Kremlin nəzarətindən çıxması ilə bağlı rəsmi Moskvanın verdiyi bəyanatlar həqiqətə söykənmir və rus riyakarlığının növbəti nümunəsidir: "Rusiyanın Debaltsevo rayonunu ələ keçirməkdə məqsədi, Ukraynanın cənub-şərq ərazilərini nəzarətə götürmək idi. Hansı ki, artıq buna nail oldu. Bildiyiniz kimi, aeroport uğrunda da kəskin döyüşlər getdi və tərəflərin bu məsələdə prinsipiallıq nümayiş etdirməsi hava alanının tamamilə bombardman olmasına, sıradan çıxmasına gətirib çıxartdı. Bu gün həmin aeroport yerlə-yeksan olmuş vəziyyətdədir. Təbii ki, Rusiya Ukrayna məsələsində yenə də riyakarlıq edir. Belə bir təəssürat yaratmaq istəyir ki, guya, atəşkəsi pozan ukraynalılardır, separatçılar isə guya, Kremlin nəzarətindən çıxıblar. Eyni hadisəni Dağlıq Qarabağda da müşahidə etmək olar. Əvvəllər ayrı-ayrı Rusiya rəsmiləri də deyirdilər ki, bizim daha ermənilərə gücümüz çatmır. Rusiyanın Azərbaycandakı səfiri Doroxin də bu yaxınlarda bildirdi ki, Rusiyanın heç də hər şeyə gücü çatmır. Yəni ki, biz ermənilərə düşündüyü qədər də ciddi təsir edə bilmərik. Şəxsən mən bu cür bəyanatları tamamilə qeyri-ciddi qəbul edirəm”.
Politoloq Elxan Şahinoğlu deyib ki, Debaltsevonun ardınca əsas strateji hədəf Mariupol şəhəridir: "Debaltsevo şəhəri rus separatçıların nəzarətindədir. Bunu Kiyev də etiraf etmək məcburiyyətində qalıb. Minsk-2 razılaşması Debaltsevonu işğaldan qurtarmadı. Çox güman ki, Mariupol uğrundakı gələcək döyüşləri də sığortalamaq iqtidarında deyil. Ukrayna ordusunun güclənməsinə, könüllü batalyonların mərkəzi komandanlığa tabe olmasına, bir sözlə, nizam-intizama ehtiyac var. Kreml ancaq güclə hesablaşır, qarşısındakını zəif hesab edirsə, onun üzərinə daha çox gedəcək”.
Ayyət Əhməd
