"Bu gün ora boz qurd işarəti ilə daxil olmaq istəyən yüz minlərlə MHP-li hazır gözləyir”
Türk Təbiblər Birliyi Türkiyənin Suriyada apardığı "Zeytun budağı” əməliyyatını tənqid edib və terrorçuların mənafeyinə uyğun açıqlamalar verib.
Birliyin mövqeyi Türkiyə ictimaiyyətinin sərt etirazına səbəb olub. Əksər siyasi partiyalar və qeyri-hökumət təşkilatları, o cümlədən həkimlər TTB-nin açıqlamasını sərt dillə tənqid ediblər. Türkiyə Prezidenti Rəcəb Tayyib Ərdoğan da məsələyə münasibət bildirib və Türk Təbiblər Birliyinin terrorçulara məhəbbət bəslədiyini deyib.
Milliyətçi Hərəkat Partiyasının lideri də Türk Təbiblər Birliyini türk düşməni adlandırıb. Partiya sədrinin sözlərinə görə, birlik həkimlərin utancı, həkimliyin üz qarasıdır: "Bu qurum haqqında dərhal hüquqi və qanuni tənzimləməyə start verilməlidir. CHP terrorçu PYD-ni təmizə çıxarma dərdindədir. Zülmə qarşı tərəfsiz qalmaq belə namussuzluqdur. Onlar terrorçuların cəzalandırılmasını "xalqın sağlıq problemi” kimi dəyərləndirirlər. Bu necə şərəfsizlik, satılmışlıqdır”. Dövlət Baxçalı vurğulayıb ki, "Zeytun budağı” əməliyyatı türklərin düşmənlərinə qarşı aparılan şərəfli mübarizədir: "Lazım olarsa, mən də Afrinə gedərəm. Bu gün ora boz qurd işarəti ilə daxil olmaq istəyən yüz minlərlə MHP-li hazır gözləyir. Milli varlığımıza kin və nifrət bəsləyənlər heç vaxt məqsədlərinə çata bilməyəcəklər. Türk millətinin mənfəəti siyasətin üzərindədir. Təhlükə çox ciddidir, artıq terrorçularla birdəfəlik hesablaşma vaxtıdır. Davamız haqdır, son silahlı xain ələ keçənə qədər əməliyyatlar davam etməlidir. Qəhrəman mehmetçiyimiz terrorçuları iman gücü ilə əzəcək”.
İsmayıl
