"Minsk qrupu təbii ki, Ermənistanın danışıqlar formatını dəyişmək kimi cəfəng iddiasını qəbul etməməklə doğru mövqe tutub”.
Bu barədə "Sherg.az”a tanınmış politoloq Nəzakət Məmmədova bildirib.
Ekspertin sözlərinə görə, Dağlıq Qarabağın erməni icması necə tərəf ola bilər ki, onlar guya hələ öz müqəddəratlarını təyinetmə uğrunda mübarizə aparırlar?! Bu, Paşinyanın məsuliyyəti Ermənistanın öz üzərindən atmaq planıdır:
"Azərbaycan Ermənistanla müharibə şəraitindədir, qoşunların təmas xəttində Ermənistan vətəndaşları işğalçı ordunun tərkibində hərbi xidmət aparır, hansı ki, onların sırasında Paşinyanın öz oğlu da var. Azərbaycan ərazisini Ermənistan işğal edib, Qarabağ ermənilərinin o qədər gücü, potensialı yoxdur ki, Ermənistanın köməyi olmadan Azərbaycanın 1/5 hissəsini işğal altında saxlasın.
Məsuliyyəti Ermənistan daşıyır və onun bu məsuliyyəti Qarabağ separatçıları ilə bölüşmək cəhdləri əbəsdir. Minsk qrupunun formatını dəyişmək lazım deyil, orada ədalət, beynəlxalq hüquqa hörmət, işğalçı və işğala məruz qalanı eyni tərəziyə qoymaq yox, fərqləndirmək lazımdır.
Format yox, keyfiyyət dəyişikliyi olmalıdır. Ermənistan doğurdan da, sülh istəyirsə, özü konstruktiv mövqe tutmalı, Minsk qrupundan da eyni yanaşma tələb olunmalıdır. Əks halda, irəliləyişə doğru heç bir addım atılmayacaq və müsbətə doğru nəsə gözləməyə dəyməz”.
Qeyd edək ki, ATƏT-in Minsk Qrupunun həmsədrləri 1 mart tarixli bəyanatlarında Azərbaycan Prezidenti İlham Əliyev və Ermənistan baş naziri Nikol Paşinyanın yaxın zamanda görüşmək qərarını alqışlayırlar. Bəyanatda tərəflər mövcud vəziyyətdə dəyişiklik yarada biləcək açıqlamalardan və hərəkətlərdən, gələcək danışıqlar üçün şərtlər irəli sürməkdən və digər tərəfin razılığı olmadan formata dəyişikliklər tələb etməkdən və aktiv hərbi döyüşləri bərpa etmək çağırışından yayınmağa səslənib. Həmsədrlər münaqişənin ədalətli və davamlı həllinin Helsinki Yekun Aktının əsas prinsipləri olduğunu bir daha qeyd edərək vurğulayıblar ki, bu prinsiplər və elementlər münaqişənin ədalətli və davamlı həlli üçün bünövrə kimi qəbul edilməlidir.
Ayyət Əhməd
