Şagirdlərin vahid məktəbli formasına dövlət atributları əlavə edilə bilər. Lakin hələlik həmin formaların üstündə "Bakı Tikiş Evi”nin emblemi həkk olunur. Digər bir çox ölkələrdə məktəbli formalarının üstündə ölkələrini təmsil edən hansısa nişanə vurulur. Azərbaycanda isə hələ bu təcrübədən istifadə olunmur.
Təhsil Nazirliyi də bu məsələyə müsbət yanaşaraq gələn ildən belə bir addımın atılmasını açıqlasa da, hələlik heç bir yenilik yoxdur. Nazirliyin mətbuat xidmətindən ANS Press-ə bildirilib ki, məktəbli formalarında dövlət atributlarının həkk olunması təhsilə aid heç bir hüquqi normativ sənəddə qeyd edilməyib: "Bununla yanaşı, ayrı-ayrı məktəblər vahid formaların üstündə şagirdlərin hansı məktəbdə təhsil almalarını qeyd edirlər”.
Təhsil ekspertləri isə belə bir addımın atılmasını dəstəkləyir və vacib hesab edirlər. Əməkdar müəllim Almaz Həsrətin fikrincə, ümumiyyətlə, hər bir azərbaycanlı Azərbaycanı əks etdirən dövlət atributlarını hər zaman üzərində gəzdirməlidir. "Eləcə də vahid məktəbli geyimlərində belə simvollar öz əksini tapmalıdır. Çünki ölkəmizdə yaşayan əcnəbi vətəndaşlar şagirdlərin geyiminə baxanda onun məktəbli olmasını tam müəyyənləşdirə bilmir. Və yaxud şagirdlərimiz xarici ölkələrə səfərlərə gedərkən formasından onun hansı ölkəni təmsil etməsi bilinmir. Lakin Türkiyədə isə hər bir məktəbli formasının üzərində dövlətin atributları var. Bu baxımdan hesab edirəm ki, dövlət atributlarımızın vahid məktəbli formalarına əlavə edilməsi şagirdlərimizin mənəvi-psixoloji durumuna olduqca müsbət təsir edəcək”.
Vüqar Şahinoğlu
