Müsavat Partiyası növbəti iqtidar-müxalifət dialoquna qatıla bilər. Partiyadan verilən məlumata görə, bu barədə Divanın ötən gün keçirilən iclasında qərar qəbul olunub. İclasda aparılan müzakirələr zamanı iqtidarın siyasi partiyalarla əlaqələrinin qurulması istiqamətindəki son təşəbbüsləri müsbət qiymətləndirilib.
Divan üzvü Nemət Kərimlinin verdiyi açıqlamaya görə, müzakirələr zamanı partiyanın prosesdə iştirakı mümkün hesab edilib. Dialoq təşəbbüsünü müsbət qiymətləndirən Müsavat başqanı Arif Hacılı da bəyan edib ki, əgər, görüşlərdə müzakirə olunacaq mövzular əvvəlcədən müəyyənləşdiriləcəksə və görüşdə iştirak edəcək siyasi qüvvələrin formatı əvvəlcədən müsavatçılarla razılaşdırılacaqsa, partiya belə görüşlərdə iştirak etməyə hazırdır: "Birinci təklifimiz artıq qəbul olunub. Prezident Aparatının rəsmisi Əli Həsənov deyib ki, iqtidar görüşlərdə müzakirə olunacaq mövzuları əvvəlcədən iştirakçılarla razılaşdırmağa hazırdır. Qalır ikinci təklifimiz. Əgər ikinci təklifimiz də qəbul olunaraq, real iqtidar-müxalifət dialoqu üçün şəraiti yaradılarsa, Müsavat prosesə qatılacaq”.
Partiya başqanının müavini Elman Fəttah da Müsavatın iqtidar-müxalifət görüşünə maraqlı olduğunu deyib: "Keçən həftə baş tutan dialoqa Müsavat Partiyası prosesdə iştirakını uyğun görməyərək "yox” cavabını verib. Əsas partiyanın iştirak etmədiyi görüşü iqtidar-müxalifət dialoqu adlandırmaq məncə düzgün deyil. Bu, sadəcə olaraq, siyasi partiyalarla görüşüdür. Biz istəyirik ki, görüş sırf iqtidar-müxalifət dialoqu müstəvisində keçirilsin”. Başqan müavini məsələ ilə bağlı Müsavat Partiyasının rəsmi açıqlamasından da danışıb: "İqtidar-müxalifət görüşlərində maraqlı olduğumuzu və şərtlərimizi irəli sürmüşük. Nəticənin necə olacağını zaman göstərəcək. Dediyimiz kimi, bu məsələ imitasiya xarakteri daşımamalıdır. İmitasiya prosesində Müsavat Partiyası iştirak edə bilməz. Müsavat mövqeyini ortaya qoyub və öz mövqeyimizdə qalırıq”.
İsmayıl
