AMEA-nın Folklor İnstitutunun Mərasim Folkloru şöbəsinin böyük elmi işçisi, fəlsəfə doktoru Atəş Əhmədlinin Novruz bayramında qapılara papaq atılmasının əslində milli-adət ənənələrə zidd olması fikrinə ictimaiyyətdən etiraz gəlib.
Oxucu Mais Yanardağ "Şərq”ə ünvanladığı məktubunda xalqın qoruyub saxladığı adətlərə müdaxiləni yersiz saydığını bildirib. Məktubda A.Əhmədliyə xitabən qeyd edilir ki, milli adət-ənənələrimizin üzərinə kölgə salmaq qəbuledilməzdir:
"Keçmişdən bizə miras qalmış elmi nailiyyətlərə, söz-söhbətə, adətlərə, dahi insanların ünvanına söz xatirinə söz demək, layiqsiz sözlər işlətmək heç də məqsədəuyğun deyil. Bu gün əsrlərdən bizə miras qalmış adət və ənənələrə qarşı çıxmağa, onun üzərinə kölgə salmağa heç kəsə ixtiyar verilmir. Əsrlər boyu bu gün bizə gəlib çatan papaqları kişilər 17 və 18-ci əsrlərdə başlarına qoyub, atlarına minib bu diyardan gediblər. Sizin dediyiniz ləyaqət rəmzi olan papağı bu gün heç kimin başında görməzsiniz! Yəqin bunu bilmirsiniz, duymursunuz. Papaqatdı, rəmzi məna daşıyan bir addır. İndi nə dam var, nə də onun bacası ki, ordan papaq atalar. İndi atılan torbalar, kisələr, papaq, qapılarsa baca missiyasını həyata keçirir. Bu gün çox mütərəqqi fikirli alim, filosof sözünə ehtiyac duyulduğu halda, belə lüzumsuz təkliflərlə özünüzü ixtiraçı-alim kimi qələmə verməkdə məqsədiniz nədir? Əgər yeni torba forması kəşf edib - ixtira edib, Novruz bayramında atmaq üçün işbazlarla əlaqə qurmaq istəyirsinizsə, ayrı sahələrdə arayın-axtarın. Xalqın əsrlərdən gəlmiş, ata-babalarının qoruyub saxladığı adətlərə müdaxilə edib, onun üzərinə kölgə salmayın”.
Məlahət
