ABŞ dövlət katibinin müavini Viktoriya Nulandın Bakı səfəri maraqlı mesajlarla yadda qalıb. Ölkə rəhbərliyi ilə görüşən Nulandın açıqlamaları və Azərbaycanın lehinə mövqe sərgiləməsi ictimaiyyət nümayəndələri tərəfindən müsbət qarşılanıb.
Ancaq Nulandın səfəri müxalifət düşərgəsində məyusluq yaradıb. Buna səbəb isə amerikalı rəsminin sözügedən düşərgəyə daxil olan partiyalarla görüşməməsidir. Müsavat və AXCP-nin timsalında radikal müxalifətin gözləntilərini puça çıxaran Nuland deyib ki, inqilab o zaman mümkündür ki, hökumət, vətəndaş cəmiyyəti və sadə insanlar arasında dialoq olmasın. Qapılar bağlı olsun və hakimiyyət problemləri eşitməsin. Amma göründüyü kimi, Azərbaycanda radikalların gözlədiyi rəngli inqilab mümkün deyil. Nuland qeyd edib ki, bu cür vəziyyətdə inqilaba zərurət ola bilməz: "Rəngli inqilab o vaxt ola bilər ki, hökumətlə vətəndaş cəmiyyəti arasında uçurumlar olsun. Azərbaycanda inqilabdan söhbət gedə bilməz”. Yeri gəlmişkən, Nuland Azərbaycanda siyasi qüvvələrlə hakimiyyət arasında dialoqun bərpasını da alqışlayıb. Onun sözlərinə görə, belə dialoq Azərbaycanın gələcəyi üçün çox mühümdür: "Dünyada ən güclü dövlət dövlətlə vətəndaşlar arasında açıq dialoqun olduğu dövlətdir”.
Nulandın mövqeyini dəyərləndirən ictimaiyyət nümayəndələri də hesab edirlər ki, Amerika radikal müxalifəti siyasi qüvvə kimi qəbul etmir.
Politoloq Sahib Alıyev deyib ki, ABŞ yetkililəri daim Azərbaycanda təkamül yolunu dəstəkləyib: "Yəqin yaddan çıxmayıb, uzun zaman ABŞ senatın xarici əlaqələr komitəsinə rəhbərlik etmiş Riçard Luqar 2000-ci illərin əvvəllərindəki narıncı inqilabların ideoloji atalarından biri olaraq dəyərləndirilirdi. Həmin Luqar 2005-ci ildə indi Amerikanın prezidenti olan Barak Obamayla birgə ölkəmizə gəlmişdi. O vaxtkı səfəri zamanı, ondan iki il sonra da verdiyi açıqlamalarda cənab Luqar deyirdi ki, Azərbaycanda narıncı inqilab mümkün deyil, çünki bu ölkə intibah yolundadır. Yəni, təkamül olan yerdə inqilab mümkünsüzdür. İndi isə eyni fikri bir az başqa şəkildə Amerika dövlət katibinin müavini Viktoriya Nuland təkrarlayır. O xanım ki, ötən il Kiyev küçələrində maydançılara öz əliylə kökə paylayırdı. Ukraynada yeni hakimiyyətdə kimlərin hansı vəzifədə əyləşdiriləcəyini də internetdə yayılan səs yazısından məhz onun dilindən eşitmişdik. Özü də o necə demişdisə, elə də oldu”.
Məsələ ilə bağlı fikirlərini bölüşən BAXCP-nin sədr müavini Niyaməddin Orduxanlı da bildirib ki, Viktoriya Nuland yalnız bir neçə QHT sədri ilə görüşüb. Həmin görüş də cəmi 20 dəqiqə çəkib: "Bu yanaşma ABŞ-ın Müsavat və AXCP-yə olan münasibətidir. Ola bilsin, ABŞ rəsmisinin radikal müxalifətlə görüşməməsinin səbəbi keçən il keçirilən prezident seçkilərində həmin qüvvələrin Rusiyanın layihəsi olan Milli Şuraya dəstək verməsi olub. Hər halda Nuland rəsmi şəkildə bəyan etdi ki, Birləşmiş Ştatlar Azərbaycanda hər hansı inqilab etmək niyyətində deyil”. BAXCP rəsmisinin sözlərinə görə, Nuland yaxşı bilir ki, Azərbaycan xalqının özü inqilab etmək arzusunda deyil: "Son illərdə Yaxın Şərqdə baş verən inqilablara nəzər yetirək. Yüz minlərlə insan bu inqilabların qurbanı olub. Şəhərlər dağıdılıb, xarabalığa çevrilib. Ölkənin iqtisadiyyatı çöküb. Bu ölkələrə milyardlarla dollar ziyan dəyib. Həmin dövlətlərə bundan sonra özlərinə gəlmək üçün on illərlə zaman lazım olacaq. Kimə lazımdır bu inqilablar?! Bütün bunlardan yalnız xalq əziyyət çəkir”.
İsmayıl
