Xarici mütəxəssislərin araşdırması zamanı bəlli olub ki, dünyada daha çox ölüm halları məhz yol qəzaları zamanı baş verir. Digər maraqlı məqam isə budur ki, qəzaların böyük qismi spirtli içkilərdən, yəni sürücülərin sərxoşluğundan qaynaqlanır.
Sərxoş halda avtomobil idarəsi, yol qəzaları və ölüm halları ölkəmizdə də sıx rast gəlinən hadisələrdəndir. Amma sükan arxasına sərxoş halda oturmaq bir yana, insanların keyfiyyətsiz spirtli içkilərdən istifadəsi də narahatlıq yaradan məqamlardandır. Həkimlərin bu barədə dəfələrlə həyəcan təbili çalmasına baxmayaraq, keyfiyyətsiz, ucuz spirtli içkilərin orqanizmə ziyanlı olduğunu bildiyi halda belə içkilərdən istifadə edənlərin sayı çoxdur.
Keyfiyyətsiz spirtli içkilərin insan orqanizminə verdiyi zərərlər barədə "Şərq”ə açıqlama verən tibb elmləri doktoru, professor Adil Qeybulla bildirib ki, ilk növbədə keyfiyyətsiz içkilərin və digər məhsulların ölkəmizə necə gəlməsini aydınlaşdırmaq lazımdır:
"Belə bir sual yaranır- "keyfiyyətsiz və zərərli spirtli içkilər ölkəmizə necə ayaq açır?”. Deməli, burada korporativ maraqlar üstünlük təşkil edir. Əgər qəzaları daha çox sərxoş sürücülər törədirsə, ilk növbədə bu hadisələrə rəvac verən bəzi strukturlar var deməkdir.
Polislər bütün gün yollarda içkili sürücü axtarırlar ki, ondan rüşvət alsınlar. Amma bununla bağlı başqa və təsirli tədbirlər görülməlidir. Belə məqamlara təmənnasız yanaşma olmayınca və bu məsələ milli təhlükəsizlik konsepsiyasının tərkib hissəsinə çevrilmədikdə problemlər davam edəcək”.
Professor bildirib ki, texniki standartlara uyğun olmayan spirtli içkilərin hər birinin tərkibində toksiki maddələr olur:
"Bütün bu toksiki maddələr insan orqanizminə, beyinə və ürəyə zərərli təsirlərini göstərir. Qida Təhlükəsizliyi Agentliyi (QTA) ölkədə xeyli sayda qida məhsullarının tərkibində mikrobların aşkar olunduğunu açıqlayıb. Lakin məsələ bu deyil. Əgər ölkədə zərərli qidalar varsa, niyə dövlət strukturları buna nəzarət etmir? Ona görə də işimizi düzgün qurmalıyıq. Özümüzü nə qədər qorusaq da, standartlara uyğun olmayan məhsullar qida rasionumuza daxil ola bilər”.
Yeganə Bayramova
