"Təhlükəsizlik Şurasının iclasını Qarabağda keçirməsi göstərir ki, Paşinyan cəbhədə yarana biləcək vəziyyətdən ciddi narahatdır”.
Bunu "Sherg.az”a açıqlamasında politoloq Məhəmməd Əsədullazadə deyib.
Ekspert bildirib ki, ATƏT-ın Minsk qrupunun həmsədrlərinin Helsinki Yekun Aktına əsaslanan son bəyanatının ardınca, Azərbaycan ordusunun geniş miqyaslı təlimləri erməni baş naziri Nikol Paşinyanın təcili Qarabağa gəlməsinə səbəb oldu:
"Paşinyanın danışıqlarda format dəyişikliyi təklifi Avropa İttifaqı tərəfindən də qəbul edilməyərək, Qarabağ danışılarında mövqeyinin zəifləməsinə gətirib çıxartdı.
Paşinyanın işğal olunmuş ərazilərdə Təhlükəsizlik Şurasının iclasını keçirərək Azərbaycan ordusunun hərbi təlimlərini və müdafiə xəttinin möhkəmləndirilməsini müzakirə edəcək.
Çünki Nikol Paşinyan hakimiyyətə gəlişindən etibarən Azərbaycan ordusunun ilk genişmiqyaslı hərbi təlimləri keçirilir. Bu təlimlər birbaşa Ermənistana mesaj xarakteri daşıyır”.
Analitikin sözlərinə görə, Paşinyan Qarabağ separtçılarına onların danışıqlarda yer ala bilməsinin mümkünsüzlüyünü izah etməyə çalışacaq:
"Növbəti hərbi əməliyyatlar Ermənistan ordusunun məğlubiyyətinə səbəb olacaq. Bu da Paşinyan üçün siyasi fiasko deməkdir. Ümumiyyətlə, Paşinyanın Xankəndində Təhlükəsizlik Şurasının iclasını keçirməsi danışıqlar prosesinə zərbədir. Bundan əlavə İrəvan bir tərəfdən Helsinki Yekun Aktının müddəalarını və Yenilənmiş Madrid Prinsiplərini qəbul edərək danışıqlarda iştirak edir, digər tərəfdən isə danışıqlardan yayınır. Ona görə də Azərbaycanın güc tətbiq etməsi gündəmə gəlməlidir”.
M.Əsədullazadənin fikrincə, ABŞ və Avropa Qarabağ konfliktinin həlli istiqamətində Azərbaycanla sıx işləməlidir:
"Yəhudi lobbisini bu prosesə dəstək verməyə cəlb etməliyik. ABŞ və Avropa dövlətləri Ermənistana diplomatik təzyiq etməyincə, İrəvan işğal olunmuş ərazilərdən çıxmayacaq və Rusiya Ermənistanda hökmranlığını davam etdirəcək. Azərbaycan Amerika və ilə münasibətləri yüksək səviyyədə inkişaf etdirməlidir ki, işğal olunmuş ərazilərin qaytarılması üçün hərbi əməliyytalara başladığımız təqdirdə bu dövlətlər neytrallığını saxlaya bilsin”.
İsmayıl
