"Ermənistan baş naziri Nikol Paşinyan çox ziddiyyətli bəyanatlar verir”.
Bunu "Sherg.az”a açıqlamasında millət vəkili, siyasi elmlər doktoru Elman Nəsirov deyib.
Deputatın sözlərinə görə, Paşinyan hakimiyyətə gəldiyi ilk günlərdə bəyan etmişdi ki, Dağlıq Qarabağ ermənilərinin adından çıxış edə bilməz. Ona görə də qondarma rejimin özü danışıqlarda "tərəf” kimi iştirak etməlidir:
"Daha sonra baş nazir bu mövqeyindən geri çəkildi. Faktiki olaraq üç dəfə qeyri-rəsmi olaraq Azərbaycan Prezidenti ilə görüş keçirdi. Təbii ki, bu görüşlərin hamısında münaqişənin əsas tərəfləri kimi Azərbaycan və Ermənistan iştirak edirdi.
Eyni zamanda dörd dəfə xarici işlər nazirləri səviyyəsində təmaslar oldu. Yenə də qondarma rejim təmsil olunmadı. Son günlər Paşinyan yenidən öz ampluasına qayıdır və iddia edir ki, separatçıların danışıqlar masasına oturmalıdır. Əlbəttə, baş nazirin bu cür yanaşması danışıqların bütün perspektivlərini kölgə altına alır. Bu yaxınlarda Paşinyan bildirdi ki, onun Azərbaycan rəhbərliyi ilə görüşündə əsas məsələ danışıqların formatının dəyişdirilməsi ilə bağlı olacaq. Ancaq baş nazirin sərsəm bəyanatları nəinki Azərbaycanda, hətta Avropa ölkələrində də çox mənfi qarşılanmaqdadır. Avropa İttifaqının xarici siyasət və təhlükəsizlik məsələləri üzrə ali komissarı Federika Moqerini Paşinyanla görüşdən sonra vurğuladı ki, heç bir ilkin şərt irəli sürmədən danışıqlara qatılmaq lazımdır. Yəni qondarma rejimin danışıqlarda iştirakı məqbul sayılmır. Avropa İtifaqının digər komissarı Yohannes də eyni məzmunda bəyanat verib və bildirib ki, mövcud format ən məqbul olanıdır. Daha sonra ATƏT-in sədri Miraslov Layçak Prezident İlham Əliyev ilə görüşündə qeyd etdi ki, danışıqların formatını dəyişmək olmaz. Gördüyünüz kimi Paşinyanın absurd təşəbbüsü müxtəlif istiqamətlərdə rədd olunmaqdadır”.
Milli Məclis üzvünün fikrincə, Paşinyanın bu məsələləri yenidən qabartması Ermənistandakı daxili situasiya ilə bağlıdır:
"Paşinyan inqilabının 10 ayı tamam oldu. Bu müddət ərzində baş nazir heç bir vədini reallaşdırmadığı üçün öz etimadını itirməkdədir. Əhali acdır, işsizdir və sosial rifahlarında ciddi dəyişiklik tələb edirlər. Ermənistan mətbuatının verdiyi rəsmi statistikaya görə, Paşinyanın hakimiyyəti dövründə ölkəni 30 mindən çox adam birdəfəlik tərk edib. Paşinyan çox çətin suallara cavab verməlidir. İnqilab yolu ilə hakim postu ələ keçirən baş nazir sələfi Sarksiyandan fərqli hansı işləri görə bilib? Təbii ki, heç nə etməyib, əksinə vəziyyət daha da kəskinləşib. Belə reallıqda Paşinyan münaqişə ilə bağlı prosesləri gərginləşdirməyə çalışır. Məqsəd daxili auditoriyanın nəzərini başqa istiqamətə çəkməkdir”.
Parlament üzvü bildirib ki, faktiki olaraq Paşinyan da Sarkisyan və Koçaryanın yolu ilə gedir:
"Hətta erməni mediası sarkazmla yazır ki, indiki situasiyada Paşinyan əvvəlki rəhbərlərin metodunu öyrənməyə və tətbiq etməyə məcburdur. Baş nazir də məhz bunları edir. Lakin Paşinyan unutmamalıdır ki, onun gedişləri heç bir nəticə verməyəcək. Əksinə, bu cür yanaşma danışıqlar prosesini buxovlayır. Danışıqların alternativi isə müharibədir. Paşinyan aprel döyüşlərindən sonra müharibənin Ermənistan necə fəlakətlər gətirdiyini yaddan çıxartmamalıdır”.
İsmayıl
