"Prezidentin turizim inkişafına xüsusi diqqət göstərməsi olduqca sevindirici haldır”
Bu sözləri "Sherg.az”a açıqlamasında iqtisadçı-ekspert Əkrəm Həsənov deyib.
İqtisadçının sözlərinə görə, ölkəmizdə gəzməli, istirahət etməli yerlər yetərincə çoxdur:
"Ölkəmiz turizmin inkişafında qonşu Gürcüstandan xeyli qabaqdadır. Prezidentin bu məsələni ciddi nəzarətə götürməsi yaxşı haldır. Düşünürəm ki, iqtisadiyyatın istənilən sektorunun inkişafı ilk növbədə qanunların işləməsi hesabına olur.
Qanunlar işləməli, məhkəmələr ədalətli, obyektiv olmalıdır. Çünki turizm deyəndə sahibkar nəzərdə tutulur. Sahibkar turizmi inkişaf etdirmək üçün gərək müəyyən miqdarda pul qoysun. Pulu qoyanda isə ilk növbədə fikirləşir ki, görəsən, mülkiyyət hüququ qorunacaqmı? Əgər sahibkar özünün müdafiə edilməsinə şübhəli yanaşırsa, o zaman qiymətləri qaldırır.
Novruz bayramına təxminən 1 ay qalıb. İnsanlarımızın il ərzində ən uzun istirahəti bu bayramdadır. Bizim öz vətəndaşlarımız bayramı burda keçirmirlər, çünki qiymətlərin bahalığını əsas gətirirlər. Bayram günlərində isə qiyməti daha da qaldırırlar. Ona görə də, vətəndaşlarımız Gürcüstana gedirlər. Bu baxımdan da dövlət başçısı turizmlə bağlı məsələlərə xüsusi fikir verir”.
Qeyd edək ki, Prezident İlham Əliyev REAL Televiziyasına verdiyi müsahibəsində ölkəmizdə turizmin inkişafı ilə bağlı bir sıra məqamlara toxunub. Ölkə başçısı bildirib ki, Azərbaycana turizmdən daxil olan vəsait vətəndaşlara, xidmət sektoruna, vergilərə və ümumi inkişafa xidmət göstərir.
Yeganə Bayramova
