Azərbaycanda qadınlar və əcnəbilər hərbi xidmətə qəbul ediləcək. Bu barədə Səfərbərlik və Hərbi Xidmətə Çağırış üzrə Dövlət Xidmətinin rəisi, general-leytenant Arzu Rəhimov bildirib.
Onun sözlərinə görə, qadınların və əcnəbilərin Azərbaycan Silahlı Qüvvələrində və qanunvericilikdə nəzərdə tutulmuş digər hərbi birləşmələrdə xidmətinə icazə verən "Bağlaşma əsasında həqiqi hərbi xidmətə daxilolmanın halları və Qaydası”nın qəbulu günün tələbidir.
A.Rəhimov onu da əlavə edib ki, ölkəmizdə yaşayan əcnəbilər və vətəndaşlığı olmayan şəxslər sırasında ordumuzda xidmət etmək arzusunda olanlar var: "Belə hallar varsa, bunu qanuniləşdirmək lazımdır”.
Addımı dəyərləndirən Milli Məclisin Müdafiə və təhlükəsizlik komitəsinin üzvü, millət vəkili Zahid Oruc "Şərq”ə açıqlamasında qeyd edib ki, bu, yeni qanun deyil. Onun qənaətincə, həmin qərar praktikadan irəli gəlib: "Təşəbbüs Azərbaycan qızlarının hərbi xidmətə çağırılması anlamına gəlməli deyil. Belə düşüncəni birmənalı şəkildə inkar edirəm. "Şərq” qəzeti vasitəsilə bir daha da çağırış edirəm ki, söhbət Azərbaycanda xanımların hərbi mükəlləffiyyətli sayılmağından getmir. Burda müddətdən artıq xidmət edən hərbi qulluqçular üçün qanunvericilik normalarının müəyyənləşməsindən bəhs olunur”.
Deputat hesab edir ki, "Azərbaycan ordusu zəifdir deyə, xarici vətəndaşları sıralarına cəlb edir” fikrini yürüdənlər yanılırlar: "Bu, ordumuzun daha geniş planda quruculuğu üçün önəmli olan qanun kimi dəyərləndirilməlidir. Çünki ordumuzun əsas heyətini azərbaycanlı oğullar təşkil edəcək. Bu, birmənalıdır”.
Ayyət Əhməd
