"İranda yayılan "quş qripi”nin Azərbaycana təsiri olmayacaq”.
Bunu "Sherg.az"-a Kənd Təsərrüfatı Nazirliyi yanında Dövlət Baytarlıq Nəzarəti Xidmətinin mətbuat xidmətinin rəhbəri Yolçu Xanvəli söyləyib.
O bildirib ki, İrana yaxın olan cənub bölgəsində və ümumən ölkədə quş qripi ilə bağlı vəziyyət sabitdir:
"Bu xəstəliyə qarşı profilaktik tədbirlərimizi görmüşük. "Quş qripi” iki halda ölkəmizə keçə bilər: kəsilmiş ev quşlarının, onların məhsullarının gətirilməsindən və köçəri quşların hərəkətindən. Ötən ilin noyabr ayından etibarən quş ətinin, diri quş və quşçuluq məhsullarının gətirilməsinə məhdudiyyət qoyulub. Bu gün də məhdudiyyət qüvvəsində qalır.
Heç bir ölkə "quş qripi”ndən sığortalanmadığına görə, profilaktik tədbirlərimizi görürük. Monitorinqlər keçirilir, quşçuluq təsərrüfatları ilə əlaqə saxlanır. Hər hansı narahatlıq olarsa, vaxtlı-vaxtında ölçü götürülür, laboratoriyalarda tədqiqat aparılır. Sevindirici haldır ki, ölkəmizdə quş qripinin hər hansı tipinə təsadüf olunmayıb”.
Qeyd edək ki, İranda quş qripinə yoluxmuş 21 milyon toyuq məhv edilib. İranın Baytarlıq İdarəsinin rəhbəri Əlirza Rəfipurun məlumatına görə, H1N8 virusuna İranın Qum, İsfahan və Yəzd vilayətlərindəki quşçuluq fermalarında daha çox rast gəlinib. İdarə rəhbəri bildirib ki, hazırda ölkə üzrə ciddi profilaktik tədbirlər həyata keçirilir.
Aysel Aslan
