Türkiyə Böyük Millət Məclisinin deputatı Sinan Oğan Xocalı soyqırımından danışıb. O bildirib ki, məlum faciəni genosid kimi qəbul edəcəklər. Parlamentarinin sözlərinə görə, soyqırıma dair ədalətin tam olaraq öz yerini tapmaması təəssüf doğurur:
"Bununla belə, inanıram ki, Xocalı faciəsi ilə bağlı ədalət gec-tez bərqərar olacaq”. Millət vəkili onu da əlavə edib ki, yüz il bundan əvvəl heç bir şəkildə var olmayan, "soyqırım” hekayəsini uyduranlar bu gün gerçək soyqırımı görmür, amma gec-tez bunu görəcəklər. Məlumat üçün bildirək ki, artıq bəzi dövlətlərin parlamentləri Xocalı faciəsini soyqırım kimi tanıyıb.
Türkiyəli həmkarının bəyanatını dəyərləndirən millət vəkili Zahid Oruc "Şərq”ə açıqlamasında bildirib ki, bu qərar rəsmi Ankaranın dövlət siyasəti üçün də çox önəmlidir: "Ötən dövr ərzində müxtəlif ölkə parlamentlərində Xocalı soyqırımı barədə apardığımız tanıtım kampaniyalarında mühüm faktları ortaya qoya bilmişik. Rəsmi Ankara Ermənistan əleyhinə hücum planlarını da Xocalı üzərindən həyata keçirə bilər. Qondarma erməni soyqırımı ortadan götürülsə, çox zəif dayaqlara malik erməni dövlətçiliyi məhv olacaq. Soyqırım məsələsində Azərbaycan və Türkiyənin eyni xətdə hərəkət etməsinin əhəmiyyəti böyükdür. Başlıca hədəf Qarabağın işğaldan azad olunmasıdır. S.Oğan da bunları bilir. Cəmiyyətinə tanış simadır. Onun dövlətlərarası və parlamentlərarası təmaslarda çox böyük rolu olub. Dəyişməz mövqeyə malik insandır”.
Ayyət Əhməd
