"Məhəmməd Əmin Rəsulzadənin məzarını qardaş Türkiyədən Azərbaycana gətirmək ədalətsizlik olardı”.
"Sherg.az”ın xəbərinə görə, bu barədə AMEA-nın Tarix İnstitutunun direktoru, Milli Məclisin deputatı, akademik Yaqub Mahmudov bildirib. Onun özlərinə görə, Rəsulzadə Türkiyədə mübarizə aparıb, qardaş xalqımız ona qoynunu açıb. O, qardaş ölkədəki tarixin bir parçasıdır:
" Mirzə Fətəli Axundovun və ya Fətəli xan Xoyskinin məzarları Tiflisdən niyə bura köçürülməlidir? Orda bizim tariximiz var. Tarixi hər yerdən yığışdırıb bura gətirsək, biz dünya tarixində zəifləyərik. 10 milyon xalq Azərbaycan ərazisində yaşayır. Amma bizim dünyada sayımız 60 milyona yaxındır. 60 milyonluq Azərbaycan xalqı dünyanın hər yerində öz tarixini yaradıb. Biz onların qəbirlərini bura yığa bilmərik. Ən görkəmli adamlarımız harada yaşayıb-yaradıbsa, dəfn olunubsa, bizim orada tariximiz var”.
Qeyd edək ki, 2018-ci il may ayının 28-də müsəlman Şərqində ilk parlamentli respublikanın – Azərbaycan Xalq Cümhuriyyətinin yaranmasının 100 illiyi tamam olur. Məhz bu mənada Cümhuriyyətin quruclarından olan dahi Məhəmməd Əmin Rəsulzadənin qəbrinin Türkiyədən Azərbaycana gətirilməsi məsələsi gündəmə gəlib.
