Güclü külək, yağış və qar Neftçala rayonunun bir sıra kəndlərində ciddi problemlər yaradıb. Nəticədə bəzi kəndlərdə elektrik verilişi dayandırılıb. Rayonun qaz təminatında da fasilələr yaranıb.
Salyan-Neftçala seçki dairəsindən millət vəkili seçilən Fəzail Ağamalı "Şərq”ə hadisədən xəbərdar olduğunu söyləyib. Onun sözlərinə görə, artıq elektrik enerjisinin bərpa edilməsi istiqamətində son tamamlanma işləri gedir. "Ümid edirəm ki, sabah (bugün-red) Salyan və Neftçalada işıq verilişi bərpa olunacaq”.
Deputat qazın kəsilməsinə də münasibət bildirib: "Qazla bağlı bu rayonlarda problemin olması ilə bağlı mənə müraciət olunmayıb. Qazla təchiz olunan kəndlərdə qaz verilir. Birinci dəfədir sizdən eşidirəm”.
Məsələ ilə bağlı "Azəriqaz” İstehsalat Birliyinin İctimaiyyətlə Əlaqələr Şöbəsinin əməkdaşı İbrahim Kərbalayev "Şərq”ə açıqlamasında bildirib ki, respublikanın heç bir yerində qaz təsərrüfatında problem yoxdur: "Həmçinin də Neftçalada havaların qarlı və şaxtalı dövründə qazın verilməsində heç bir məhdudiyyət qoyulmayıb”.
Qurum sözçüsü Neftçalanın bir sıra kəndlərinə də qaz verilməsinin planda olduğunu deyib: "Sura, I Qaralı, Qədimkənd, Aşağı Qəhrəmanlı kəndlərinə daşıyıcı məhəllədaxili qaz xətləri çəkilir və tamamlanma işləri gedir, sayğaclar quraşdırılır”.
Məlumat üçün qeyd edək ki, bir neçə gün öncə, Neftçalada qar yağan gündən bəri 10 gündür kəndləri işıqsız qalıb. Rayonun demək olar ki, 80 faizində işıq yoxdur. Bu səbəbdən 10 gündən çoxdur uşaqlar da dərsə gedə bilmir. Elektrik enerjisinin yoxluğu səbəbindən telefonların batareyası da sönüb. Qaz da yoxdur. Bu barədə "Yeni Müsavat” qəzetinə Neftçala rayonundan olan sakinlərdən biri məlumat verib.
Vüqar Şahinoğlu
