Tarix boyu saxtakarlıqla məşğul olan ermənilər Dağlıq Qarabağa dair növbəti təxribata əl atıblar. Onlar Qarabağı tamamilə xristianlaşdırıblar. Belə ki, "Christiancountries”.com saytı işğal edilmiş Azərbaycan torpaqlarını ayrıca bir qurum kimi göstərməklə yanaşı, onu ölkələr arasında əhali sayına, xristianlığın yayılmasına görə Vatikandan sonra ikinci yerdə göstərib.
Modern.az məlumat verir ki, siyahıya görə, Qarabağda əhalinin 99,9, Ermənistanda isə 98,7 faizi xristiandır. Araşdırmalara görə, atəşkəsdən sonra ermənilər Qarabağda 30-dan çox kilsəni inşa və bərpa edib.
Məsələni dəyərləndirən Qarabağ Azadlıq Təşkilatının (QAT) sədri Akif Nağı "Şərq”ə açıqlamasında qeyd edib ki, bunu Dağlıq Qarabağdakı qondarma rejim öz işğalına bəraət qazandırmaq məqsədilə gerçəkləşdirib: "Separatçılar çalışır ki, ərazilərimizdə yaratdığı qanunsuz rejimi müxtəlif vasitələrlə tanıtdırsın. Müxtəlif yerlərdə adını hallandırsın. Bu formalardan istifadə edib, qondarma rejimi təbliğ etməyə çalışırlar. Maliyyə dəstəyi almaq niyyətini güdürlər”.
Qurum sədrinin sözlərinə görə, onların ifşa olunmasına dair Azərbaycan tərəfi ciddi addımlar atmalıdır: "Ölkəmiz dövlət və cəmiyyət səviyyəsində mövqeyini bildirməlidir. Baxın, Xarici İşlər Nazirliyi sülh naminə müsabiqə təşkilatının Dağlıq Qarabağda konsert verməsi barədə qabaqlayıcı tədbir gördü. Azərbaycan XİN-i buna çevik reaksiya verdi. Bədnamların əməllərini özlərinə qarşı çevirmək lazımdır. Bir sözlə, yalanlarını ifşa etməliyik ki, verdikləri məlumatlardan dəlil kimi istifadə olunmasın. Bu şəkildə olmalıdır. Çıxış yolu ancaq budur. Çünki ermənini dinc vasitələrlə - dialoqla, xalq diplomatiyası - yola gətirmək mümkün deyil. Bizimlə ancaq güc görəndə razılaşacaqlar. Azərbaycan silahının gücünü görməlidirlər. Dağlıq Qarabağ silah gücü ilə azad olunmalıdır”.
"Modern”.az saytının baş redaktoru Elşad Eyvazlının qənaətincə, problemin aradan götürülməsinin yolu, torpaqlarımızın işğaldan azad edilməsidir: "Əks halda, ermənilər orda hər iş görəcəklər. Azərbaycanın bütün tarixi abidələrini məhv edəcəklər və yaxud başqa formaya salıb öz adlarına çıxaracaqlar. Sovet dövründə Ağdərə zonasında, Xankəndində, Şuşada, Kəlbəcərdə, Laçında ermənilər bizə məxsus abidələri ya məhv edirdilər, ya da həmin abidələri bir az özlərinin üslubuna uyğunlaşdırıb özününküləşdirirdilər. Bunların canlı şahidi olmuşam. O vaxtı bunu müxtəlif adlarla həyata keçirirdilər. Bildirirdilər ki, guya daha yaxşı görünməsi üçün öz üslublarına salırlar. Bir daha bəyan edirəm ki, torpaqlarımız Ermənistanın nəzarətindədirsə, xristianlaşma gedəcək”.
Düşmən ölkənin saxtalaşdırma siyasətinin qarşısının alınmasından söz açan həmsöhbətimiz hesab edir ki, bunun üçün cəmiyyətimizin həmfikir olub, dik durması və total olması lazımdır: "Uşaqdan-böyüyüə hər kəs torpaqlarımızın işğaldan azad olunmasına hazır olmalıdır. Bu hazırlıq sözdə deyil, əməldə də özünü aydın şəkildə büruzə verməlidir. Əməl odur ki, Azərbaycanın jurnalisti Ermənistanın jurnalistindən peşəkar olmalıdır. Deputatımız erməni deputatından təəssübkeş olmalıdır. Azərbaycan müəllimi Ermənistan müəllimindən savadlı olmalıdır. Azərbaycanın naziri Ermənistan nazirindən intellektual, çalışqan və tələbkar olmalıdır. Bu halda məsələlər həll olunacaq. Düzdü, dövlətimiz üzərinə düşən vəzifəni yerinə yetirir. Ən incə məqam isə odur ki, Qarabağ məsələsində Azərbaycan insanı görməli olduğu işləri qarışdırır. Cəmiyyət, dövlət və hökumət görməli olduğu işi yaxşı bilsə, ciddi irəliləyişə nail ola bilərik”.
Ayyət Əhməd
