"Bu gün sərnişindaşımada mövcud olan avtobusların 50 faizdən çoxunun yenilənməsinə ciddi ehtiyac var”.
Bu barədə "Sherg.az”a bütün avtobusların Bakı Kart sisteminə keçməsi prosesi haqqında danışarkən Bakı Nəqliyyat Agentliyinin (BNA) Mətbuat Xidmətinin rəhbəri Mais Ağayev bildirib.
O qeyd edib ki, BNA sərnişindaşıma sahəsində göstərilən xidmətin keyfiyyətinin artırılması, bu sahədə mövcud çatışmazlıqların aradan qaldırılması istiqamətində bir sıra tədbirlər həyat keçirir:
"BNA-nın tələbinə uyğun olaraq bu il daşıyıcılar tərəfindən yeni nəqliyyat vasitələrinin gətirilməsi nəzərdə tutulub. Yeni nəqliyyat vasitələri gətirildikcə problemli xətlər üzrə avtobuslar yenilənəcək. Kart sisteminə keçid də məhz nəqliyyat vasitələrinin yenilənməsinə bağlı məsələdir. Avtobusların yenilənməsi ilə kart sisteminə keçiddə təmin ediləcək”.
Qeyd edək ki, sərnişindaşımada mövcud olan bir çox avtobusların kart sisteminə keçməsi hələ də təmin edilməyib. Sərnişinlər də sosial şəbəkələrdə bununla bağlı narahatlıqlarını ifadə edir.
Aysel Aslan
