"Tələbələrin təqaüdlərinin artırılması təqdirəlaiq haldır. Buna görə ölkə başçısına minnətdarlıq edirəm. Bu addım, tələbələrin daha yaxşı oxumasına, həvəslə təhsil almasına töhfə olacaq”.
Bu sözləri "Sherg.az”a Prezident İlham Əliyevin tələbələrin təqaüdlərinin artırılması ilə bağlı fərman və sərəncamlarına münasibət bildirərkən, sabiq millət vəkili, professor Şahlar Əsgərov deyib.
Professor deyib ki, bu sərəncamlar elm arxasınca getmək istəyən gənclərə də stimul olacaq:
"Ölkə rəhbərliyi mütəmadi olaraq təqaüdləri, pensiyaları artırır. Həmişə artım olanda, tələbələrin təqaüdlərinə də baxılır. Bu da əhalinin sosial rifahının yaxşılaşdırılmasına hesablanmış addımlardır ki, xalq tərəfindən təqdir edilir. Cənab Prezidentin növbəti dəfə tələbələrin təqaüdlərini artırması, gənclərə qayğının, diqqətin nəticəsidir. Bu eyni zamanda gənclərin təhsilinin inkişafına yardım edəcək, onlar təhsillərinin keyfiyyətini artıracaqlar. Bu gün Bakıda universitetdə oxuyan, kirayədə qalan tələbələr var. Alacaqları təqaüd onların social vəziyyətində də müsbət dəyişiklik yaradacaq. Mən deyərdim ki, ölkə başçısının bu sərəncamları gənclərin təhsilinə hərtərəfli müsbət təsir göstərəcək”.
Anar
