)ukra.jpg)
Gecə yarısı (Bakıda bazar günü 02:00) qüvvəyə minəcək atəşkəsə cəmi bir neçə saat qalsa da, Ukraynanın şərqində kəskin döyüşlər davam edir.
Polis rəsmisi deyib ki, rusiyapərəst üsyançılar strateji əhəmiyyət daşıyan Debaltseve şəhərini dəhşətli bombardmana tutub.
Sahildəki Mariupol şəhərində də döyüşlərin yenidən başladığı deyilir.
Daha əvvəl Ukrayna prezidenti Petro Poroşenko xəbərdarlıq etmişdi ki, şərqi Ukraynadakı müharibəyə son qoymaq üçün imzalanan saziş "ciddi təhlükə" altındadır.
Cümə axşamı Minskdə imzalanan sazişə görə, bazar günü gecə yarısından atəşkəs rejimi başlamalıdır.
Cənab Poroşenko həmçinin Rusiyanı həmləsini "xeyli artırmaqda" ittiham edib.
Şənbə günü səhər saatlarında üsyançıların idarə etdiyi Donetsk şəhərində artilleriya atəşi səsləri eşidilib.
Strateji baxımdan mühüm Debaltseve şəhərinin ətrafında gərgin döyüşlərin davam etdiyi deyilir. Debaltseve hökumət tərəfindən idarə olunsa da, üsyançılar onu demək olar ki, tamamilə əhatə edib.
Cümə günü şərqi Ukraynada artilleriya atəşi nəticəsində 10-dan çox dinc sakinin öldürüldüyü bildirilir.
Bunu hansı tərəfin törətdiyi aydın olmasa da, rusiyapərəst üsyançılar və Ukrayna ordusu bir-birini ittiham edir.
