"Azərbaycan Prezidenti 3 yaşınadək uşaqların sosial müdafiəsinin gücləndirilməsi barədə tapşırıq verib. İqtisadi və Sosial İnkişaf Mərkəzinin (CESD) uşaq pulunun bərpası ilə bağlı təkliflərini hökumətə təqdim etməsindən qısa müddət sonra dövlət başçısı tərəfindən belə bir göstərişin verilməsini yüksək qiymətləndiririk".
Bu barədə "Sherg.az"a iqtisadçı-ekspert Vüqar Bayramov bildirib.
Onun sözlərinə görə, CESD-nin təkliflərində də uşaqlar yaş qruplarına görə təsnifləşdirilir və 3 yaşınadək uşaqlara daha çox sosial müavinətin verilməsi xüsusi əsaslandırılır:
"Bu baxımdan, 3 yaşınadək uşaqlara sosial müavinətin verilməsi uşaq pulunun mərhələli şəkildə bərpası kimi qiymətləndirilməlidir.
Bu addım uşaqların sosial müdafiəsi baxımdan çox vacibdir. Qeyd etmək istərdim ki, CESD-nin təklifləri rasional və real imkanlar nəzərə alınmaqla hazırlanıb və sevindirici haldır ki, artıq proses başlayır. Dünən təklifimiz sosial şəbəkədə təqdim olunandan sonra uşaq pulu məsələsində fərqli yanaşmaların şahidi olduq və əslində bunu normal da qarşılayırıq. Amma bu gün başqa reallığı müşahidə etdik: təklifllərimiz mərhələli şəkildə tətbiq olunacaq".
Qeyd edək ki, Milli Məclisin Əmək və sosial siyasət komitəsinin sədri Hadı Rəcəbli söyləyib ki, yaxın zamanlarda üç yaşına qədər olan uşaqlara verilən sosial müavinətlərin artırılması məsələsinə baxıla bilər. Millət vəkili deyib ki, bununla bağlı prezident İlham Əliyev tapşırıq verib.
Ayyət Əhməd
