Azərbaycanda son statistik göstəricilərə görə, məhkum olunmuş 14-17 yaşlı uşaqların sayında, eləcə də onların arasında azadlıqdan məhrum edilmə yolu ilə cəzalandırılanların sayında artım var. Dövlət Statistika Komitəsi xəbər verir ki, 2017-ci ildə 14-17 yaşında 323 nəfər məhkum olunub. Onlar arasında 111 nəfərinə azadlıdan məhrum edilməklə cəza tətbiq olunub. Qalan 16 nəfər islah işləri, 2-si ictimai işlər, 98 nəfəri cərimə, 96 nəfəri isə şərti məhkumetmə cəzası ilə cəzalandırılıb.
Bu hal ötən illərlə müqayisədə azadlıqdan məhrumetmə yolu ilə cəzalandırılan 14-17 yaşlı məhkumların sayında artımın olduğunu göstərir. Belə ki, 2010-cu ildə məhkum edilən 238 nəfərdən 46-sı, 2016-cı ildə isə 261 nəfərdən 79-u azadlıqdan məhrum edilərək cəzalandırılıb.
Yeniyetmələr arasında cinayət hallarının artması səbəblərindən danışan sosioloq Cavid İmamoğlu "Sherg.az”a bildirib ki, yeniyetməlik özünəməxsusluğu ilə seçilən dövrdür. Onun sözlərinə görə, yeniyetməlik dövründə gənclər ailəsi, təhsil aldığı idarə, yaxud da dostları ilə münasibətdə problem yaşaya bilir.
Sosioloq qeyd edib ki, statistikaya baxsaq görərik ki, məhkum edilən yeniyetmələrin əksəriyyəti oğlanlardır:
"Qızlar arasında bu hal demək olar ki, müşahidə olunmur və yaxud da sayları azdır. Hesab edirəm ki, oğlanlara ailədə və cəmiyyətdə verilən sərbəstlikdən irəli gələn haldır. Sərbəstlik nəticəsində yeniyetmə oğlanlar ciddi səhvlərə yol verir və məhkum olunurlar. Bəzən valideyn öz oğluna hədsiz sərbəstlik verir və bununla da fəxr edir. Əslində bu, heç də alqışlanası hal deyil. Ana-ata övladı ilə bacarmayanda, onun istədiklərini etməyə məcbur olur. Valideyn var ki, gənc yaşlarında uşaqlarına maşın, bahalı mobil telefonlar alırlar. Bunu etməklə, valideyn istəyir ki, uşaq onu narahat etməsin. Belə uşaqlar da cinayətə meylli böyüyürlər. Nəticədə onların hansısa istəyi yerinə yetirməyəndə, cinayətə təşəbbüs göstərirlər”.
Sosioloq vurğulayıb ki, yeniyetməlik yaş dövrü Azərbaycanda dərindən araşdırılmayıb:
"Məktəblərdə psixoloqlar yeniyetmələrlə lazımi qədər iş aparmırlar. Həmçinin, valideynlər öz övladlarına dəstək olmalıdırlar. Bu yaşda gənclər zərərli vərdişlərə, narkotikə meylli olurlar. Ona görə də, bu yaş arası yeniyetmələrin tərbiyəsi zamanı diqqətli olmaq lazımdır”.
Anar
