Şuşada saxlanılan kəlbəcərli girovlar qaytarılmalıdırlar. Bunu Bakıda təşkil edilən mətbuat konfransında ABŞ dövlət katibinin Avropa və Avrasiya məsələləri üzrə köməkçisi Viktoriya Nuland bildirib. ABŞ dövlət katibinin köməkçisi Dilqəm Əsgərov və Şahbaz Quliyevin azad edilməsi məsələsini Ermənistanda da qaldıracağını bəyan edib.
Nəticəsinin necə olmasından asılı olmayaraq, Nulandın təşəbbüsü Azərbaycan ictimaiyyəti tərəfindən müsbət qarşılanıb. Əksəriyyət hesab edib ki, super dövlətin yüksək rəsmisinin Ermənistanın əleyhinə mövqe tutması ölkəmiz, xüsusən girovlarımızın azad edilməsi baxımından mühüm əhəmiyyət daşıyır. Millət vəkili, Ana Vətən Partiyasının sədri Fəzail Ağamalı da ABŞ dövlət katibinin kifayət qədər mötəbər bir heyətlə Azərbaycana səfərini çox yüksək qiymətləndirib. Deputatın sözlərinə görə, bu səfər təkcə Azərbaycanla bağlı deyil: "Nulandın səfəri və açıqlamaları Qafqazda ABŞ siyasətinin və maraqlarının ciddi xarakter daşıdığının göstəricisidir. Onun kəlbəcərli girovların azad edilməsi ilə bağlı açıqlaması da xoş niyyətin əlamətidir. Nəhayət ki, ABŞ uzun zamandan sonra qanunsuz girov götürülən azərbaycanlılarla bağlı məsələni gündəliyə gətirməyə qərar verib. Özü də yetərincə yüksək çinli rəsminin dilindən. Ümid edirik ki, girovların azad edilməsində bu çağırışın da mühüm rolu və təsiri olacaq”.
Mətbuatda ABŞ-Azərbaycan münasibətlərinin gərgin olması barədə fikirlərin yayıldığını deyən F.Ağamalı deyib ki, bu gün ABŞ-Azərbaycan münasibətlərinin gərginləşməsinə çalışan qüvvələr var: "Onlar ABŞ-da erməni lobbisinin təsiri altında olan qüvvələrdir. Lakin görünən budur ki, rəsmi Bakı və Vaşinqton arasında münasibətlər yüksək səviyyədədir. Hesab edirəm ki, bu münasibətlər strateji tərəfdaşlığın şərtlərinə uyğun olaraq daha da inkişaf edəcək”.
Politoloq Elxan Şahinoğlu da hesab edir ki, Nulandın Bakı səfərində verdiyi mesajlar iki ölkə arasında münasibətlərdəki gərginliyin ortadan qalxmasında dönüş nöqtəsi ola bilər. Xüsusilə, ABŞ Dövlət katibinin Dağlıq Qarabağda saxlanılan iki azərbaycanlı girovun azad olunması üçün çalışacaqlarını deməsi çox önəmli açıqlamadır: "Görünür, ABŞ insan haqları və demokratiyanı ön plana çəkmək qərarı verib. Hər halda müsbət təşəbbüsdür. Baş verən proseslərə baxmayaraq, rəsmi Vaşinqton Azərbaycanla münasibətini gərginləşdirmək istəmir”.
İsmayıl
