Milli Məclisin vitse-spikeri Ziyafət Əsgərov Vəkillər Kollegiyasına qəbulda keçid balının aşağı salınması təklifinə etiraz edib.
"Sherg.az" bildirir ki, parlamentin bu gün keçirilən iclasında vitse-spiker deyib ki, Azərbaycanda hüquqşünasların Vəkillər Kollegiyasına qəbulda nəzərdə tutulan bal 60-dan 50-yə endirmək doğru deyil:
"Sonra da deyəcəklər bunu yenə endirin, 40 bal olsun. Konstitusiyada yazılıb ki, əhaliyə keyfiyyətli hüquqi yardım göstərək. Keyfiyyətli hüquqi yardım göstərmək istəyən hüquqşünas 60 balı toplaya bilmirsə, bağışlayın, bu, qeyri-ciddi məsələdir. Axı o balı toplamaq çətin deyil. Bütün buna baxmayaraq, bu sahədə işlər gedir, dövlətin nəzarətindədir. Yaxın vaxtlarda bu sahədə ciddi irəiləyişlər olacaq”.
O xatırladıb ki, keçən il "Məhkəmə Hüquq Şurası haqqında” qanuna dəyişiklik edilib: "Dəyişikliyə əsasən, tək hakim olan rayonlarda hakim məzuniyyətə gedirsə, Məhkəmə Hüquq Şurası həmin rayona hakimləri ezam edə bilir. Yəni belə bir səlahiyyəti var. Əlbəttə ki, hakimlərin sayı ilə bağlı problem hələ də qalmaqdadır. Bu istiqamətdə işlər gedir. Vəkillik insititutu ilə bağlı isə Avropa göstəricilərindən geriyik”.
Anar
