Mərhumun xanımı şübhələrini dilə gətirib
Ötən ilin avqust ayında qəfil dünyasını dəyişən meyxana ustası Vüqar Paşayevlə (Biləcəri) bağlı şok iddia irəli sürülüb. Mərhumun 12 il dini nikahlı xanımı olan Samirə Zeynalova “Lent.az”a müsahibəsində meyxanaçının ölüm səbəbinə inanmadığını söyləyib. O, Vüqar Biləcərilinin qanqrenadan deyil, zəhərlənərək dünyasını dəyişdiyini bildirib. S.Zeynalova bunun kiminsə əməli olduğunu xüsusi vurğulayıb. Lakin onu ölümündən qısa müddət əvvəlmi, yaxud da daha öncədənmi zəhərlədikləri haqda nəsə bilmədiyini deyib. Meyxanaçının sevgilisi bu pisliyi kim tərəfindən, nəyə görə törədildiyini bilmədiyini açıqlayıb.
Samirə xanım söz ustasının qardaşı Kamran Paşayevə şikayət edib, məsələnin araşdırılmasını təklif edib. O isə deyib ki, bu olayı ilahi ədalətin öhdəsinə buraxıb.
V.Paşayevin yaxın dostu, həmkarı Orxan Əzimov (Lökbatanlı) “Şərq”ə mövcud durumdan xəbərdar olmadığını söyləyib:
“Bu barədə bir söz deyə bilmərəm. Allah Vüqara rəhmət eləsin, yeri behişt olsun. O mənim dostum, qardaşım idi. Kiminsə nədənsə şübhəsinin olduğundan məlumatım yoxdur. Nəsə söyləyə bilmərəm. Samirə xanımı da Vüqarın sağlığından bəri tanıyıram”.
