“Hərbi qulluqçuların android telefonlarla çəkdikləri videoların qarşısı alınmalıdır”
Ötən həftələrdə Ermənistan-Azərbaycan sərhəddində vəziyyətin gərginləşməsi informasiya təhlükəsizliyi məsələsini yenidən gündəmə gətirib.Bu cür gərgin hallarda əksər insan tərəfindən real təhlükə obyekti kimi qiymətləndirilən TikTok, İnstaqram və digər sosial şəbəkələrə məhdudiyyət qoyulması nə dərəcə məqsədəuğundur?
Bu barədə “Sherg.az”a danışan hərbi ekspert Ramil Məmmədli bildirib ki,ümumi sosial şəbəkəyə yox, məhz təhlükə yarada biləcək informasiyaları sosial şəbəkələrə təqdim edən şəxslərə məhdudiyyət qoyulmalıdır:
“İnzibati qaydada belə halların qarşısını almaq lazımdır. Deyək ki, məsələn döyüşlərdə erməni tərəfdən alınan əsirlərin döyülmə anını əks etdirən bir video yayılıb. Əlbəttə, hər bir azərbaycanlı üçün milli təəssübkeşlikdən yanaşsaq, düşmən tərəfin döyülməsi məqbul və sevindiricidir. Amma məsələnin digər tərəfi də var. Sonradan bu video görüntülər Azərbaycan dövlətinin hansısa bir beynəlxalq təşkilat qarşısında hesabat verməsinə gətirib çıxara bilər. Necə ki, 2020-ci ilin iyul ayında Tovuz döyüşlərindən sonra təmas xəttini keçən erməni kəşfiyyatçının döyülməsini əks etdirən video sonradan rezonans doğurdu. Bu mənada məsələnin mənbəyini aşkar etmək və qarşısını almaq lazımdır. Ordumuz bizim başımızın tacıdır. Amma bəzi məqamlar var ki onlara diqqət yetirmək lazımdır. Bu da döyüşlərdə çəkilən videogörüntülərin sosial şəbəkələrdə yer almasıdır”.
Hərbi ekspert həmin videoların yayılma prosesinə diqqət çəkib:
“Döyüşdə iştirak etmiş hərbçi öz sevincini bölüşmək üçün video çəkir. Öz yaxınlarını sevindirmək məqsədilə həmin videonu onlaradan birinə göndərir ki, onun qəhrəmanlığını görsünlər. Ya onun bu görüntüləri göndərdiyi, ya da sonrakı üçüncü, dördüncü şəxs onu sosial şəbəkələrdə paylaşır. Nəticədə bütün sosial şəbəkələr və mediada yayılır”.
R.Məmmədli birmənalı şəkildə hərbi qulluqçuların android telefonlarla çəkdikləri videogörüntülərin yaymasının qarşısının alınmalı olduğunu vurğulayıb. Hərbi ekspert sonda yalnız belə olduqda problemin həllini tapacağını
əlavə edib.
