Zəngəzurun dünyanın növbəti hərbi eskalasiya coğrafiyasına keçməməsi üçün bölgədə yeni düzən olmalıdır
"Sülh müqaviləsi hazır olsa da, müharibə ehtimalı yüksəkdir". Bu barədə Bakı Politoloqlar Klubunun sədri Zaur Məmmədov deyib. Ekspert bildirib ki, bəziləri dünya birliyi buna razı olmaz deyir:
"Hansı dünya birliyi? Azərbaycan Ordusu müdafiə olunur və bir neçə gündür səbr nümayiş etdirir. Bunun müqabilində dünya birliyi Ermənistan ordusunun təxribatları fonunda susur. Tovuz döyüşlərində də susurdular. 44 günlük müharibəyə bir neçə gün qalmış da susurdular. Müharibəyə 3 gün qalmış Azərbaycan Prezidenti İlham Əliyev BMT tribunasında Ermənistanı və beynəlxalq ictimaiyyəti xəbərdar etdi. Nəticədə növbəti dəfə atəş açan erməni ordusuna qarşı genişmiqyaslı əməliyyatlara başlandı. 1918-ci ildə erməni hökuməti AXC hökuməti qarşısında Qarabağa iddia etməyəcəkləri barədə öhdəlik götürdü, lakin elə həmin il öhdəlik pozuldu. 1920-ci illərdə qanunsuz olaraq torpaqlar Ermənistan SSRİ-yə verildi".
Analitik vurğulayıb ki, ermənilərin apardığı siyasət nəticəsində XX əsrdə dəfələrlə minlərlə azərbaycanlı həlak olub:
"Psevdo-liberallar nə istəyir? Bunları unudaq və inanaq ki, ermənilər bir daha bizə hücum etməyəcəklər. Əlbəttə, bu, cəfənfiyyatdır. Zəngəzurun dünyanın növbəti hərbi eskalasiya coğrafiyasına keçməməsi üçün bölgədə yeni düzən olmalıdır. Ermənistan ordusunun son bir həftə ərzində mütəmadi olaraq atəşkəsi pozması, Naxçıvan da daxil olmaqla bütün şərti sərhədlərə ən müasir hərbi texnikalar cəmləşdirməsi, qurğular yerləşdirməsi, istehkamlar qurması onların təxribata başlaya biləcəkləri ehtimalını artırır. Azərbaycan tərəfi özünümüdafiə hüququna malikdir. Sülh mətninin hazır olduğu vaxtda Ermənistan hökumətinin hərbi eskalasiyaya getməsi Paşinyan-Makron geosiyasi oyunu ola bilər. Azərbaycan sülhə hazırdır və əgər Paşinyan səmimidirsə, vaxtı uzatmasın. Referendumun tarixini elan etsin".
