“Əli Kərimlinin son ümid yeri blogerlikdir”

Turan 14:55 04.09.2019 Cəmiyyət 851

“Prezidentin İctimai-siyasi məsələlər üzrə köməkçisi Əli Həsənovun özünün Facebook səhifəsində yazdığı kimi AXCP sədri Əli Kərimlinin siyasi bioqrafiyası çoxdan bitib və o indi adi blogger kimi maraq doğurur”.

Bunu “Sherg.az”a açıqlamasında Demokratik Azərbaycan Dünyası Partiyasının sədri Əlisahib Hüseynov deyib.
Partiya sədri bildirib ki, Ə.Kərimlinin son aylardakı fəaliyyətinə nəzər saldıqda görürük ki, adam siyasi partiya sədri meyarından çoxdan uzaqlaşıb:

“Təxminən 30 ilə yaxın bir müddət ərzində davam edən uğursuz müxalifətçilik karyerası AXCP sədrini həm siyasi fiqur kimi, həm də bir insan kimi yorub. Əli Kərimli sözün həqiqi mənasında tükənib. Son ümid yeri isə blogerlikdir. Suda boğulanın saman çöpündən yapışması məsəlindəki kimi indi Əli Kərimli də blogerlikdən yapışıb. Onun son vaxtlar yaxın tariximizi təhrif etməsi, Ziya Bünyadov, Fətulla Hüseynov, jurnalist Rasim Əliyev kimi tanınmış şəxslərin qətllərinə görə, mövcud iqtidarı suçlaması məhz blogerlik fəaliyyətinin təzahürüdür. Bütün bunlar da öz növbəsində insanların diqqətini müxalifətin siyasi proseslərdəki uğursuzluqlarından yayındırmağa xidmət edir.
Bu uğursuzluq sindromu istər Əli Kərimlinin özünü, istərsə də onun cəbhədaşlarını, "Milli Şura"dakı tərəfdaşlarını getdikcə daha da aqressivləşdirir, radikallaşdırır. AXCP sədrinin Azərbaycanın 7 rayonunun işğal olunmasını və Hacı Məmmədov bandasının törətdiyi silsilə qətlləri iqtidarın ayağına yazmaq cəhdləri məhz sözügedən aqressivləşmənin nəticəsidir”.
Ekspert vurğulayıb ki, bir siyasətçi radikal müxalifətçiliyin ifrat nöqtəsinə çatdıqda məsuliyyət hissini itirir və yeri gəldi-gəlmədi sağa-sola cürbəcür ittihamlar səsləndirməyə başlayır:
“Əli Kərimli belə bir psixoloji affekt nöqtəsindədir. Amma tövsiyyə edərdim ki, əvvəlcə getsin özünün də təmsil olunduğu və dövlət katibi portfelini daşıdığı AXC-Müsavat iqtidarı dönəmində baş verən özbaşınalıqların hesabatını versin.
Biz onların bir illik hakimiyyəti dövründə baş verən polis özbaşınalıqlarını, küçə atışmalarını, o vaxtkı daxili işlər nazirinin hərbə-zorbalıqlarını hələ də unutmamışıq. Ə.Kərimlinin AXC-Müsavat iqtidarı dönəmində baş verən özbaşınalıqları görməzdən gələrək, son 26 ildə ölkədə “üstü açılmayan cinayət işlərini” sadalamağa başlaması Sevinc Osmanqızının Yutub izləyicilərini çaşdırmaqdan başqa bir şey deyil.
Əlbəttə, Əli Kərimli Osmanqızının simpatizanlarını, izləyicilərini çaşdıra bilər. Amma son 30 ilin siyasi proseslərinə yaxşı bələd olan şəxsləri isə əsla aldada bilməz”.