İlqar Vəlizadə: Putin Balasanyanın məktubuna cavab verərsə, Azərbaycanla olan münasibətlər tamamilə korlanar
Qarabağdakı erməni silahlı quldur dəstəsinin başçılarından olan Vitali Balasanyan Rusiya lideri Vladimir Putinə müraciət ünvanlayıb.
Özünü qondarma rejimin keçmiş "təhlükəsizlik şurasının katibi" adlandıran Balasanyan Rusiyanın vasitəçiliyi ilə ermənilərin Azərbaycanın əzəli tormaqlarına yenidən qayıdacağına ümid etdiyini bildirib.
Balasanyan bu il Sovet İttifaqının faşist Almaniyası üzərində Böyük Qələbənin 80-ci ildönümünün qeyd olunduğunu fürsət bilib, Rusiya liderinə erməni xalqının uydurma qəhrəmanlığından bəhs edib. Belə ki, həmin böyük qələbəyə 90 min Qarabağdan olan ermənin töhfə verdiyini deyib.
"Ümid edirik ki, sizin vasitəçiliyinizlə Böyük Vətən Müharibəsində qalib gəlmiş xalqın varisləri olan Qarabağ erməniləri öz tarixi vətənlərinə qayıdacaqlar", - o müraciətində bildirib.
Politoloq İlqar Vəlizadə Sherg.az-a deyib ki, Vitali Balasanyanın müraciəti boş və mənasızdır:
"Bunu ondan əvvəl başqa erməni nümayəndələri də ediblər, yəni Putinə məktublar göndəriblər. Balasanyan kimdir ki, ona da diqqət yetirilsin? Onun məktubu da heç bir əhəmiyyət kəsb etmir. Eyni zamanda Rusiyanın regionda həm Azərbaycan, həm də Ermənistanla bağlı maraqları var. Əgər Putin Balasanyanın məktubuna cavab verərsə, Azərbaycanla olan münasibətlər tamamilə korlanar. Kreml də bunu çox yaxşı anlayır. Digər tərəfdən Rusiyada hər hansı dairələr ola bilər ki, ermənilərin buradakı nüfuzunu artırmaq üçün bundan istifadə etsinlər. Lakin yenə də düşünmürəm ki, bu məktub hər hansı rezonans doğursun".
