Azərbaycanda keçiriləcək Türk Dövlətləri Təşkilatının (TDT) növbəti Zirvə görüşü yeni təşəbbüslər üçün mühüm platformaya çevriləcək. Bunu Türk Dövlətləri Təşkilatının Baş katibi Kubanıçbek Ömüralıyev AKİpress-ə müsahibəsində bildirib. Ömüralıyev qeyd edib ki, 2025-ci ildə bizim iki mühüm sammitimiz olacaq - Macarıstanda qeyri-rəsmi sammit və Azərbaycanda 12-ci rəsmi sammit.
Bu iki mühüm sammit əsas qərarların müzakirəsi və Təşkilatın gələcək inkişaf istiqamətlərini müəyyən edəcək yeni təşəbbüslərin irəli sürülməsi üçün mühüm platformaya çevriləcək.
“Müstəqil Mətbuat Mərkəzi" İctimai Birliyinin sədri, politoloq Elçin Xalidbəyli “Sherg.az”a söyləyib ki, Türk Dövlətləri Təşkilatı hazırda inkişaf və yüksəliş mərhələsini keçir:
“Azərbaycan və Türkiyə bu təşkilatın avanqard dövlətləri rolunda çıxış edirlər. Rəsmi Bakı Türk Dövlətləri Təşkilatını beynəlxalq məkanda ən güclü qrumların sırasına daxil etmək məsələsini özünün xarici siyasətinin prioritetləri sırasına salıb. Bu məsələ Türkiyə tərəfindən də xüsusi olaraq diqqət mərkəzində saxlanılır. Hazırda dünyada yeni düzənin formalaşma mərhələsi davam etdiyinə görə rəsmi Bakı və rəsmi Ankara Türk Dövlətləri Təşkilatının beynəlxalq arenada qlobal iradə sahibinə çevrilməsi üçün bütün imkanları səfərbər etmiş vəziyyətdədir. Bu baxımdan hesab etmək olar ki, Türk Dövlətləri Təşkilatının növbəti sammitlərində çox önəmli qərarlar və proqramlar qəbul oluna bilər. Artıq Qərbdə Türk Dövlətləri Təşkilatının inkişaf və yüksəlişindən müəyyən narahatlıq keçirməyə başlayıblar. Bəzi Qərb siyasi dairələri hesab edirlər ki, Türk Dövlətləri Təşkilatına üzv ölkələr Avropa İttifaqına alternativ olaraq qrum və anoloji ortaq inkişaf platforması yaradıblar. Hesab olunur ki, Türk Dövlətləri Təşkilatı türk dünyasının Avropa Birliyi səviyyəsində bir platformoya çevrilmək üzrədir. Əgər bu baş verərsə, həmin zaman yeni dünya düzənində bu təşkilat türk dövlətlərini vahid mərkəzdə birləşdirən qlobal məkanın əsas siyasi mərkəzlərinə çevirə bilər”.
