Paşinyanın "heç bir halda strateji yollar Azərbaycanın nəzarətinə keçməyəcək" açıqlaması ortaya çıxan suallara cavab vermir
"Ermənistan Baş naziri Nikol Paşinyanın "delimitasiya nəticəsində strateji infrastrukturlar Azərbaycanın nəzarətinə keçməyəcək" açıqlaması erməni ictimaiyyətinə hesablanmış mesajdır"
Bu barədə politoloq Turab Rzayev deyib. Ekspertin sözlərinə görə, son günlərdə sərhədlərin delimitasiya və demarkasiya prosesi zamanı strateji bölgələrin Azərbaycanın nəzarətinə keçəcəyi ilə bağlı Ermənistan daxilində müzakirələr gedir:
"Ermənistanda bunu təhdid kimi görənlərin bəyanları erməni ictimaiyyətində narahatlığa səbəb olur. Süni ajiotaj yaradanlar Ermənistanın mühasirəyə düşəcəyini, xarici əlaqələrdə Azərbaycandan asılı olacağını deyirlər. Buna kifayət qədər əsaslar da var. Çünki delimitasiya prosesi ilə Qazaxın digər kəndləri də Azərbaycana qaytarılsa, Ermənistan-Gürcüstan yolları nəzarətimiz altında olacaq. Həmçinin, Naxçıvanın Kərki kəndi ilə bağlı proses yekunlaşsa, Ermənistanın İrana gedən yollara Azərbaycan nəzarət edəcək. Görünür, Paşinyan hökuməti bu barədə yayılan söhbətlərdən sonra belə bir açıqlama verməyə məcbur qalıb. Proses artıq gedir. Qazaxdan İranadək sərhədlər delimitasiya və demarkasiya olmalıdır. Bu da Azərbaycan ərazilərinin qaytarılması deməkdir ki, o zaman strateji infrastrukturların bir çox hallarda Azərbaycanın nəzarətinə keçməsi deməkdir".
Analitikə görə, erməni ictimaiyyətinin narahatlığını aradan qaldırmaq üçün Ermənistan əsas yollara alternativ yollar çəkməli, ya da həmin ərazilərin əvəzinə başqa ərazilər verməlidir:
"Strateji yollar keçən əraziləri özündə saxlamaqla, digər bölgədən Azərbaycana torpaq verilə bilər. Mümkündür ki, Azərbaycan tərəfi müvvəqqəti olaraq həmin yollardan Ermənistanın istifadəsinə icazə versin. Amma indiki halda Paşinyanın "heç bir halda strateji yollar Azərbaycanın nəzarətinə keçməyəcək" açıqlaması ortaya çıxan suallara cavab vermir. Azərbaycan tərəfi öz maraqları uğrunda sonadək mübarizə aparacaq. Hansısa ərazimizin Ermənistanda qalmasına imkan verməyəcəyik".
