Macarıstanın MVM şirkəti Azərbaycanın bərpa olunan enerji sektorunda iştirak etməkdə maraqlıdır.
"APA Economics" xəbər verir ki, bunu ADA Unviersitetində keçirilən "Innovative Pathways to a Greener Future: Renewable Energy and Emission Reduction" tədbirində MVM şirkətinin rəhbəri Karoly Matrai bildirib.
Onun sözlərinə görə, şirkət Azərbaycanda "Şahdəniz" qaz-kondensat yatağının işlənilməsi layihəsinin iştiraçısıdır.
"Biz öz təcrübəmizi Azərbaycanla bölüşmək istərdik. Biz həm də regionda geniş biznes imkanlarını gördüyümüz üçün ölkənin bərpa olunan enerji sektorunda iştirak etməkdə maraqlıyıq. Yaşıl Enerji Dəhlizi layihəsi Macarıstan baxımından mühüm əhəmiyyət kəsb edir. "Şahdəniz" layihəsi Macarıstanın enerji təchizatının şaxələndirilməsinə yol açdığı kimi, Yaşıl Dəhliz də başqa bir imkandır", - Karoly Matrai qeyd edib
Onun sözlərinə görə, bu, ona görə vacibləşir ki, Macarıstan kifayət qədər elektrik enerjisi istehsal etmir və hava şəraitindən asılı olaraq öz tələbatının 20-25%-ni idxal hesabına ödəyir.
"Yaşıl Enerji Dəhlizi layihəsi Xəzərin ucuz elektrik enerjisinə çıxışı açacaq ki, bu da tədarükün daha da şaxələndirilməsi üçün həm iqtisadi, həm də siyasi zəmin yaradacaq. Onun Macarıstan üçün strateji əhəmiyyəti də məhz bundadır. Üstəlik, bu layihə bütün region üçün dönüş nöqtəsi ola bilər.
Onun sözlərinə görə, MVM Azərbaycanda bərpa olunan enerji sektoruna sərmayə qoymaq üçün danışıqlara artıq başlayıb.
"Biz ilk mərhələdəyik, ona görə də hələ heç nə qərarlaşdırılmayıb, lakin biz inanırıq ki, Yaşıl Enerji Dəhlizi Təşəbbüsü sayəsində bizim Azərbaycanda olmaq və Azərbaycanın bərpa olunan enerji sektoruna mühüm töhfə vermək üçün yaxşı imkan var", - Karoly Matrai vurğulayıb.
