ABŞ Prezidenti Donald Trampın mayın 15-də İstanbulda ukraynalı və rusiyalı həmkarı Volodimir Zelenski və Vladimir Putin arasında mümkün görüşə qoşulmaqla bağlı açıqlaması Avropadan tutmuş Yaxın Şərqə qədər müxtəlif ölkələr arasında diplomatik təlaşa səbəb olub.
Teleqraf xəbər verir ki, bu barədə “Reuters” agentliyi məlumat yayıb.
Agentlik bildirir ki, Amerika liderinin açıqlamasından sonra ölkələr arasında diplomatik təmaslar sıxlaşıb.
Nəşr xatırladır ki, Vladimir Putin mayın 11-də İstanbulda (Türkiyə) Ukrayna ilə birbaşa danışıqlar təklif edib. Volodimir Zelenski ona cavabında bildirib ki, ayın 15-də İstanbulda Putini şəxsən gözləyəcək. Ardınca hazırda Səudiyyə Ərəbistanında səfərdə olan Donald Tramp onlara qoşulmağı təklif edib.
ABŞ Prezidenti sıx qrafikinin olmasına baxmayaraq, Rusiya və Ukrayna liderlərinin görüşünə qatılmaq üçün vaxt ayıra biləcəyini bəyan edib.
Donald Trampın təklifindən sonra ABŞ dövlət katibi Marko Rubio , Ukrayna, Böyük Britaniya və Fransa xarici işlər nazirləri, həmçinin Avropa İttifaqının xarici siyasət qurumunun rəhbəri də daxil olmaqla, avropalı həmkarları ilə Ukraynada “atəşkəsə aparan yol”u müzakirə edib.
Rusiya xarici işlər naziri Sergey Lavrov da türkiyəli həmkarı Hakan Fidanla danışıqlar aparıb.
