Müxalifət millət vəkillərinin masalarının üzərinə uşaq paltarları, uşaq corabları və şprislər qoyublar
Türkiyə Böyük Millət Məclisində büdcə müzakirələri qızğın keçir.
“Sherg.az” NTV.com.tr”yə istinadən xəbər verir ki, müxalifət millət vəkilləri səhiyyə naziri Kamal Memişoğluna Yenidoğan şəbəkəsinin səbəb olduğu körpə ölümlərini simvolizə edən körpə əşyalarını TBMM-ə gətirməklə etirazlarını bildiriblər. K.Memişoğlu isə Yenidoğan şəbəkəsindən sonra xəstəxanaların doğum şöbələrində yeni neonatal reanimasiya nəzarət sisteminin tətbiq edildiyini açıqlayıb. Müxalifət millət vəkilləri isə masalarının üzərinə uşaq paltarları, uşaq corabları və şprislər qoyublar. K.Memişoğluna "istefa verməlisən. Burada olmağın etik deyil", ifadələri ilə səslənən millət vəkilləri “bunlar sizin əyalət sağlamlıq müdiri olarkən lisenziya verdiyiniz, yoxladığınız xəstəxanalarda dünyasını dəyişən körpələrdən qalan əmanətlərdir”, deyiblər. CHP İzmir millət vəkili Rəhmi Aşkın Türeli Yenidoğan şəbəkəsi davasını xatırladaraq, “Cümhuriyyət tarixinin ən faciəli hadisələrindən birinin yaşandığı bir yerdə heç nə olmamış kimi davranmaq və bu danışıqlara qatılmaq istəmirik. Nazirin çıxışına qulaq asmaq istəmirik, onu istefaya dəvət edirik”, söyləyib. CHP millət vəkilləri daha sonra iclas salonunu tərk ediblər. Nazir K.Memişoğlunun salamlamadakı isti münasibətinə "İstefa" sözləri ilə reaksiya verilib. K.Memişoğlu reaksiyalarla bağlı, "Bizim üçün bu əməliyyatın adı "Çürük Alma Əməliyyatı"dır. Dəstənin adı "İnsanlığa qarşı olanlar dəstəsi"dir", deyib. İnzibati yoxlamalarla yanaşı, alimlərlə dəlillərə əsaslanan tibbi təcrübələr və risk idarəçiliyini ehtiva edən yeni bir yoxlama modelini tətbiq etdiklərini izah edən K.Memişoğlu, "bu çərçivədə Neonatal Reanimasiya ilə başladığımız bu sistemi tətbiq edirik. Bütün sahələr üzrə təftiş və qiymətləndirmə elmi komissiyası çalışır”, söyləyib.
