Avropa İttifaqının (Aİ) qaz bazarının fundamental əsasları Azərbaycandan da daxil olmaqla davamlı idxal sayəsində sabit qalır.
“Report” xəbər verir ki, bunu Avropa Komissiyasının Enerji üzrə Baş Direktorluğunun Enerji Platforması Qrupunun direktoru Kristina Lobilyo Bakıda keçirilən Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarında çıxışı zamanı bildirib.
Onun sözlərinə görə, Aİ-də enerji təhlükəsizliyi bu gün əvvəlki qış dövrləri ilə müqayisədə əhəmiyyətli dərəcədə dayanıqlı vəziyyətdədir.
"Vəziyyət etibarlı təchizat, xüsusilə strateji tərəfdaşlıqlar çərçivəsində sabitdir. Bu kontekstdə Azərbaycanın töhfəsini, eləcə də qazın anbarlara vurulması üzrə müsbət dinamikanı və tələbatın azaldılması ilə bağlı tədbirləri xüsusilə qeyd etmək istəyirəm", - K.Lobilyo qeyd edib.
Eyni zamanda, o vurğulayıb ki, geosiyasi gərginliyin artması əlavə risklər yaradır ki, onları gözardı etmək olmaz.
"Son üç ildə Aİ Rusiya qazından asılılığı azaltmaq üçün böyük iş görüb. Əgər əvvəllər qazın təxminən 45 %-i Rusiyadan təchiz edilirdisə, bu gün bu pay həm boru kəmərləri, həm də LNG şəklində 13 %-ə qədər azalıb", - Avropa Komissiyasının nümayəndəsi bildirib.
O əlavə edib ki, Aİ etibarlı təchizatçılarla əməkdaşlığı genişləndirərək enerji mənbələrinin aktiv şəkildə diversifikasiyasını davam etdirir. Bununla yanaşı, təşkilat 2050-ci ilə qədər iqlim neytrallığına nail olmaq hədəfinə sadiq qalır.
K.Lobilyo keçid dövründə təbii qazın mühüm rol oynayamağa davam edəcəyini vurğulayıb: "Təbii qaz növbəti iki onillikdə sabitliyin və iqtisadi inkişafın əsas elementi olaraq qalır. Cənub Qaz Dəhlizi bu prosesdə strateji yer tutur və biz bu marşrut üzrə təchizat həcmlərinin daha da artacağını gözləyirik".
