Sadəcə bizdə pərakəndəlik var, hesabat hazırlayan beynəlxalq təşkilatlar Azərbaycandan normal və təkmil məlumat ala bilmir
Ermənistan qlobal oyunçuların iştirakı və dinamik startap ekosistemi ilə regionun texnoloji mərkəzinə çevrilib. Moderator.az-ın məlumatına görə, bu barədə Amerikanın dünyaca məşhur “Forbes” jurnalı yazıb.
Jurnal bildirir ki, müxtəlif indekslər Ermənistanı Cənubi Qafqaz regionunda inkişaf etməkdə olan texnoloji mərkəz kimi göstərir. Bu, onun Sovet İttifaqının aparıcı texnologiya mərkəzlərindən biri kimi rolunun mirasıdrır. SSRİ-də ilk ümumi təyinatlı kompüterlər 1960-cı illərin əvvəllərində məhz Ermənistanda hazırlanıb.
“Forbes”in məlumatına görə, Ermənistanda innovasiya sektoru vençur fondları və erməni əsilli sahibkarların dəstəyi sayəsində daha da müstəqil olmaqdadır.
Məqalənin müəllifi Kreyq Smit İrəvanın 1990-cı illərin iqtisadi böhranının nəticələrini aradan qaldırmaq tarixindən danışıb və ölkənin texnoloji potensialının bərpasında diasporun rolunu vurğulayıb: "Moderna" biotexnoloji şirkətinin həmtəsisçisi Nubar Afeyan, "Reddit" həmtəsisçisi Aleksis Ohanian və keçmiş "Apple" texniki direktoru və "macOS" əməliyyat sisteminin yaradıcısı Avi Tevanyan kimi insanların hamısı daim öz ölkələri ilə bağlı qalıb".
İT ekspertləri isə hesab edir ki, Ermənistanın Cənubi Qafqazın texnoloji mərkəzi olması iddiası yalandır.
Mövzu ilə bağlı “Sherg.az"a danışan Azərbaycan İnformasiya və Kommunikasiya Texnologiyaları Sənayesi Assosiasiyası (AİKTSA) İdarə Heyətinin sədri Elvin Abbasov 44 günlük Vətən müharibəsi dövründə Avropa və digər qərb təşkilatlarının Ermənistana verdiyi mənəvi dəstəyi xatırladıb. Onun sözlərinə görə, “Forbes”də çıxan bu yazı da məhz həmin dəstəyin davamıdır:
“Amma bir məsələni də etiraf etməliyəm ki, resurslarının az olmasına rəğmən Ermənistan onları təkmil halda nümayiş etdirməyi bacarır. Reallıqda Azərbaycanın ekosistemi Ermənistandan dəfələrlə yüksəkdir, sadəcə bizdə pərakəndəlik var. Hesabat hazırlayan beynəlxalq təşkilatlar Azərbaycandan normal və təkmil məlumat ala bilmir. Bu istiqamətdə fəaliyyət göstərən təşkilatlarımız aktiv deyil. Beynəlxalq indeks qurumları ölkələrlə bağlı statistik rəqəmləri dövlət qurumlarından yox, yerli təşkilatlardan, vətəndaş cəmiyyətlərindən alırlar. Azərbaycanda isə müstəqil təşkilatlar az büdcə ilə öz imkanları daxilində fəaliyyət göstərirlər. Beynəlxalq təşkilatlarla əməkdaşlıq edə, onların etimadını qazana bilmirlər. Buna görə də Azərbaycanın sahib olduğu ekosistemi təkmil formada beynəlxalq təşkilatlara göstərə bilmirik. Reytinq hesablanarkən şəhərlərdə innovasiya mərkəzlərinin, investorların, qeydə alınmış startapların və akselerasiya proqramlarının sayı, o cümlədən startaplar üçün yaradılmış infrastruktur və onlardan istifadə, güzəşt mexanizmləri, universitetlərdə innovasiya tədbirləri, startap bazar həcmi, tədqiqat və araşdırma işləri kimi meyarlar nəzərə alınır.
Azərbaycanda isə startaplarla bağlı vahid statistikaları təzəlikcə bizim Assosasiya, AİKTSA vikipediyada yerləşdirib. Ölkəmizin beynəlxalq reytinqlərdə daha da irəliləməsi üçün yerli innovasiya ekosisteminə dair yeniliklər, reallaşan layihələr və dəstək tədbirləri ilə bağlı məlumatların beynəlxalq arenada paylaşılması istiqamətində işlər davam etdirilir. Biz ölkəmizdə olan startapları axtarıb tapır, bir-bir onları danışdırırıq. Ümumilikdə Azərbaycanın İT şirkətlərini, İT istehsalat gücünü dövlət qurumları deyil, məhz müstəqil təşkilatlar formalaşdırmalı, eyni zamanda beynəlxalq indeks təşkilatları ilə də əməkdaşlıq etməlidir”.
E.Abbasovun fikrincə, Ermənistan lobbisinin gücü nəticəsində beynəlxalq təşkilatlar ermənilərə süni reputasiya qazandırmağa səy göstərir. Amma bizim səhifimiz də yox deyil: “Özümüzə bəraət qazandıra bilmərik. Bizim günahımız odur ki, əlimizdə olan resursları düzgün və təkmil formatda dünya ictimaiyyətinə təqdim edə bilmirik. Ermənilər isə bu sahədə çox bacarıqlıdır. Yenə deyirəm, Ermənistanın Cənubi Qafqazın texnoloji mərkəzi olması iddiaları absurddur. Heç bir halda onların ekosistemi bizdən üstün ola bilməz. Sadəcə, bizdən fərqli olaraq onlar əllərindəki az resursla dəvədən fil düzəldə bilirlər”.
