Müdafiə Nazirliyinin Maliyyə və Büdcə İdarəsinin sabiq rəisi general-mayor Nizami Məmmədov, Hərbi Hava Qüvvələrinin Maliyyə Xidmətinin sabiq rəisi polkovnik Cəlal Kazımov, Quru Qoşunların Maliyyə İdarəsinin sabiq rəisi Bayram Bayramov və Hərbi Dəniz Qüvvələrinin Maliyyə Xidmətinin sabiq rəisi Vüsal Əlizadənin barəsində olan hökmdən verilən apellyasiya şikayəti üzrə məhkəmə prosesi keçirilib.
Sherg.az xəbər verir ki, bu gün Bakı Apellyasiya Məhkəməsində hakim İbrahim İbrahimlinin sədrliyi ilə keçirilən prosesdə təqsirləndirilən şəxslərin anket məlumatları dəqiqləşdirilib.
Təqsirləndirilən Cəlal Kazımov anket məlumatlarına etiraz edib, orada ailəli yazıldığını, lakin hazırda subay olduğunu bildirib.
Məlum olub ki, təqsirləndirilən Cəlal Kazımovun keçmiş həyat yoldaşı və övladları məhkəməyə maraqlı şəxs qismində müraciət edib. Onlar üzərinə həbs qoyulan əmlakların geri qaytarılmasını istəyirlər.
Vüsal Əlizadə və Cəlal Kazımovun vəkilləri prosesdə iştirak etməyib.
V.Əlizadə vəkilindən imtina etdiyini və dövlət hesabına vəkillə təmin olunmasını, Cəlal Kazımov isə, ümumiyyətlə, vəkildən imtina etdiyini deyib.
Məhkəmə vəkilin təyin olmasının zəruri olduğunu təqsirləndirilən şəxslərin nəzərinə çatdırıb.
Amma hər iki şəxs vəkilləri olmadan ilkin baxış iclasının keçirilməsinə etiraz etməyib.
Məhkəmə yerində müşavirə edib. Təqsirləndirilən şəxslərdən Cəlal Kazımov və Vüsal Əlizadənin vəkillərinin iclasda iştirak etmədiyini nəzərə alaraq, baxış iclasının təxirə salınması barədə qərar qəbul edib. Hər iki şəxsin vəkillə təmin olunacağı bildirilib.
Proses fevralın 17-də davam etdiriləcək.
Qeyd edək ki, Müdafiə Nazirliyinin Maliyyə və Büdcə İdarəsinin sabiq rəisi general-mayor Nizami Məmmədov, Hərbi Hava Qüvvələrinin (HHQ) Maliyyə Xidmətinin sabiq rəisi, polkovnik Cəlal Kazımov, Quru Qoşunların maliyyə idarəsinin rəisi Bayram Bayramov, Hərbi Hava Qüvvələrinin maliyyə xidmətinin sabiq rəisi Vüsal Əlizadə, Müdafiə Nazirlinin Satınalmalar və Təchizat İdarəsinin sabiq rəisi, polkovnik Mahir Şirvanov, həmçinin nazirliyin Satınalmalar və Təchizat İdarəsinin sabiq rəisi Məlikməmməd Qurbanov, nazirliyin mənzil istismar idarəsinin sabiq rəisi, polkovnik Fikrət Mirzəyev Dövlət Təhlükəsizliyi Xidmətinin keçirdiyi xüsusi əməliyyat nəticəsində həbs ediliblər.
Təqsirləndirilən şəxslərin hər birinə Cinayət Məcəlləsinin 179.4-cü (xüsusi ilə külli miqdarda ziyan vurmaqla mənimsəmə törətmək) maddəsi ilə ittiham irəli sürülüb.
Cinayət işi üzrə ümumilikdə dövlətə dəymiş ziyan 143 milyon manta hesablanıb.
Cinayət işləri ayrı-ayrı icraatlarda baxılması üçün məhkəməyə göndərilib.
Cinayət işi üzrə Maliyyə Nazirliyi zərərçəkmiş qismində tanınıb.
Bakı Hərbi Məhkəməsinin hökmünə əsasən, Nizami Məmmədov və Bayram Bayramov hər biri 11 il 6 ay, Cəlal Kazımov 11 il, Vüsal Əlizadə isə 10 il 6 ay müddətində azadlıqdan məhrum edilib. Eyni zamanda, təqsirləndirilən şəxslərin üzərinə həbs qoyulmuş əmlaklarının müsadirə edilməsi barədə qərar qəbul olunub.
