Dövlət, xalqın mənafeyi, milli düşüncə tərzimizin qorunması nəyi tələb edirsə, bunu dəstəkləyəcək qanunlar qəbul olunmalıdır
“Rus məktəblərinin ləğvi, qeyri-Azərbaycan dili məktəblərində ödənişli təhsil məsələsini gündəmə gətirdikdə minlərlə adam səs-səsə verib üzərimizə gəlirlər. Amma Rusiyada həmin qanuna etiraz edən bir nəfər tapa bilməzsiniz”
Rusiya Dövlət Duması rus dilini bilməyən mühacir övladlarını məktəbə götürməyi yasaqlayan qanun qəbul edib. Qanunun lehinə 409 səs verilib. Qanuna görə, dil biliklərini müəyyənləşdirən test sınağı ödənişsiz olacaq. Məktəbə götürülənlərin rus dili biliyi ilə yanaşı, Rusiyada qanuni əsaslarla yaşayıb-yaşamaması da yoxlanılacaq. Dövlət Dumasının bilgisinə görə, təhsil ili başlayarkən, mühacir övladlarının 41 faizi rus dilində ünsiyyət zamanı çətinlik çəkib. Dumada aparılan müzakirələrdə "Keyfiyyətli təhsilin əldə edilməsini və məktəb proqramının uğurlu mənimsənilməsini təmin etmək üçün rus dilini bilmək zəruridir. Əks halda, dili bilməyən uşağın öyrənmə və sosial uyğunlaşma prosesləri son dərəcə çətinləşir. O da, sinif yoldaşları və müəllimlər də problemlər yaşayır", - fikirləri səslənib. Qanun 2025-ci il aprelin 1-dən qüvvəyə minib.
Siyasi şərhçi Azər Həsrət “Sherg.az"a açıqlamasında qeyd etdi ki, özünə hörmət edən dövlət, özünə hörmət edən xalq belə də davranmalıdır:
- Bu, bəlkə də, yeganə məsələdir ki, mən Rusiyanın tərəfindəyəm. Özlərinin dövlət hegemonluqlarını hər vəchlə sübut etməyə çalışırlar. Təəssüf ki, biz bunu edə bilmirik. Hər dəfə bu istiqamətdə müzakirələr açıldıqda ruslar qalır bir tərəfdə, içimizdəki “ruslardan artıq ruslar” bizi linç edirlər. Hətta dövlət nəsə bir addım atmaq istəyəndə vətəndaşlar tapılır ki, “hüququmuz tapdanır, hüququmuz pozulur”, deyərək dövləti məhkəməyə verirlər. Azərbaycanda manqurtlaşma o qədər dərinə işləyib ki, bu cür məsələlərdə dövlət də gərəkli şəkildə hərəkət etməkdə çətinlik çəkir. Bu hadisədən çıxış edərək insanlarımıza səslənirəm; açın gözünüzü Rusiyaya baxın. Rusiya bunu edirsə, Azərbaycan çoxdan etməliydi. Biz Rusiya torpaqlarını işğal etməmişik, biz öz mədəniyyətimizi, dilimizi zorla ruslara sırımamışıq. Rusiya bizi işğal edib, öz dilini bizə zorla sırıyıb, rus dilini bilmək məcburiyyəti qoyub. Artıq 35 ildir müstəqilik, Rusiyanın işğalçılıq siyasəti, işğala, soyqırımı siyasətinə verdiyi gizli-açıq dəstək də hamıya bəllidir, amma hələ də Rusiya təsirini burada yaşatmağa çalışanlar var. Dövlət addım atmaq istəyəndə o manqurt vətəndaşlar əl-ayağa dolaşır, dövləti məhkəməyə çəkirlər. Rus məktəblərinin ləğvi, qeyri-Azərbaycan dili məktəblərində ödənişli təhsil məsələsini gündəmə gətirdikdə minlərlə adam səs-səsə verib üzərimizə gəlirlər. Amma Rusiyada həmin qanuna etiraz edən bir nəfər tapa bilməzsiniz. Bizim ölkədə də belə olmalıdır. Dövlət, xalqın mənafeyi, milli düşüncə tərzimizin qorunması nəyi tələb edirsə, bunu dəstəkləyəcək qanunlar qəbul olunmalıdır.
