- “Cəmiyyətin böyük hissəsi gün işığından daha çox yararlanmaq istəyir”
ABŞ Prezidenti Donald Tramp “saatların irəli-geri çəkilməsi cəfəngiyyatına” son qoyulmasını istəyib. Yay-qış saatı tətbiqinin iqtisadiyyata böyük yük gətirdiyini bildirən Tramp, axşam saatlarında gün işığından daha çox istifadə olunması üçün daimi yay saatına keçidi dəstəklədiyini açıqlayıb. Türkiyədə Berat Albayrakın Enerji və Təbii Sərvətlər naziri olduğu dövrdə, 10 il əvvəl tətbiq olunan daimi yay saatı modeli indi ABŞ-ın da gündəmindədir.
Sherg.az xəbər verir ki, ABŞ-da yay-qış saatı tətbiqinin ləğv edilməli olduğunu bildirən Tramp bu istiqamətdə hazırlanan qanun layihəsinin Senat tərəfindən qəbul edilməsinə çağırış edib.
“Bu tətbiq ölkə iqtisadiyyatına böyük yük gətirir”
ABŞ Prezidenti sözügedən tətbiqin ölkə iqtisadiyyatına böyük yük gətirdiyini və insanların həyat rejimini pozduğunu müdafiə edərək deyib:
“İldə iki dəfə saatları irəli və geri çəkmək kimi cəfəngiyyat və ənənədən qurtulmaq istəyirik.”
Cəmiyyətin böyük hissəsinin gün işığından daha çox faydalanmaq istədiyini, lakin qış saatına keçildikdə havanın çox erkən qaraldığını bildirən Tramp Senatda gözləyən qanun layihəsinin qarşısını alan Respublikaçı senator Tom Kottonu tənqid edib.
Layihəyə mane olan senatora etiraz etdi
Sözügedən qanun layihəsinin daha əvvəl Nümayəndələr Palatasından keçdiyini xatırladan Tramp deyib:
“Nümayəndələr Palatası bunu 80 faizdən çox səslə qəbul edib. Qanun layihəsi bir müddətdir Senatda gözləyir və ümid edirəm ki, Tom Kottonu hərəkətə gətirə biləcəyik. Tom Koton layihəyə mane olur, bunu etməməlidir.”
Tramp ötən gün sosial media hesabında Kottonun mobil telefon nömrəsini paylaşaraq seçiciləri senatora sözügedən qanun layihəsinin qarşısını almaması üçün təzyiq göstərməyə çağırmışdı.
ABŞ-da yay saatı tətbiqi
ABŞ-da Birinci Dünya müharibəsindən etibarən müxtəlif formalarda tətbiq edilən yay saatı sistemi 1966-cı ildə qəbul olunan federal qanunla ölkə üzrə tətbiq edilməyə başlanıb.
Türkiyə daimi yay saatına keçib
Türkiyə 2016-cı ildə Berat Albayrakın Enerji və Təbii Sərvətlər naziri olduğu dövrdə daimi yay saatı tətbiqinə keçib.
Daimi yay saatı tətbiqi nəticəsində hər il 1 milyard lirədən çox elektrik enerjisinə qənaət edilib.
Tətbiq başladığı vaxtdan əldə olunan ümumi elektrik enerjisi qənaəti 10 milyard kilovat-saatı ötüb. Başqa sözlə, 2020-ci ildə adambaşına elektrik enerjisi istehlakı 3 661 kilovat-saat hesablandıqda, əldə edilən qənaət hesabına 1,9 milyon insanın bir illik elektrik enerjisi tələbatını qarşılamaq mümkün olub.
ABŞ-da gündəmə gətirilən yeni tənzimləmə də oxşar şəkildə saatların geri çəkilməsinin ləğv edilməsini, vətəndaşların axşam saatlarında gün işığından daha çox yararlanmasını və iqtisadi fəaliyyətin dəstəklənməsini hədəfləyir.
Qanun layihəsinin Senatdan da keçməsi halında ABŞ Türkiyənin təxminən 10 ildir tətbiq etdiyi daimi yay saatı modelinə bənzər sistemi həyata keçirmiş olacaq.
