Mövsümündən tez yetişən meyvələr artıq piştaxtaları bəzəməyə başlayıb.
Baku TV xəbər verir ki, bu meyvələrin qiyməti olduqca yüksəkdir. Belə ki, hazırda göycə alçasının kiloqramı 80 manat təşkil edir.
Şəmkir çiyələyinin kiloqramı 15, əriyin kiloqramı isə 25 manatdır.
Alıcıların əksəriyyəti qiymətlərin yüksək olduğunu və bəzi meyvələrin mövsümə uyğun olmadığını bildiriblər.
Mövzu ilə bağlı danışan qida eksperti Fərid Səfərov ''Sherg.az"a söyləyib ki, havalar isindikcə sevimli meyvələrimizin də mövsümü gəlib çatır:
“Yay meyvələri - qarpız, yemiş, ərik, əncir, üzüm, gavalı, alça olduqca ləzzətli və faydalı meyvələrdir. Lakin unutmaq olmaz ki, bu meyvələri mövsümündən kənar yetişdirmək üçün müxtəlif kimyəvi maddələrdən, dərmanlardan istifadə edirlər. Hətta pestisidlər, mumlar və konservantlar meyvə və tərəvəzlərin mövsümdən kənarda böyüməsinə, təzə görünüşünü saxlamasına kömək etmək üçün əlavə edilir. Pestisidlər və konservantlar isə baş ağrısı, ürəkbulanma, xərçəng, astma və Parkinson xəstəliyi də daxil olmaqla insan sağlamlığını bir çox cəhətdən təhdid edə bilər. Ona görə də meyvə alarkən mövsümə uyğun olub - olmadığına diqqət edin, sağlamlığınızı və cibinizi qoruyun”.
