Çin ABŞ-la qlobal razılaşma planlarından imtina edərək ticarət müharibəsinə hazırlaşır.
Bu barədə "Voll Strit Jurnal" yazıb.
“ABŞ Prezidenti Donald Trampın son tarif tədbirləri ilə Pekinin dialoqa ümidi məyusluq və qəzəbə çevrildi”, - yazıda qeyd olunur.
Bildirilir ki, Tramp administrasiyasının ticarət siyasəti Vaşinqtonla ortaq dil tapmağı müdafiə edən Çin siyasətçilərinin məyusluğuna səbəb olub.
Məsələni dəyərləndirən iqtisadçı ekspert, Natiq Cəfərli "Sherg.az"a açıqlamasında bildirib ki, Çin də, Amerika da sərt ritorikanı ilk vaxtdan elan etməklə qarşılıqlı güzəştlər üçün zəminlər hazırlayırlar:
“Təbii ki, tariflərin yüksəldilməsi dünya iqtisadiyyatında daralmaları da qaçılmaz edəcək. Çünki ticarət zəiflədikcə, istehsal azalacaq, istehsal azaldıqca isə işsizlər ordusu yarana bilər. Yəni bu, zəncirvari təsir edən məsələlərdir. Amma Çindən fərqli olaraq, Amerika Birləşmiş Ştatlarında bu vəziyyəti amortizasiya və idarə edə biləcək alətlər daha çoxdur. Ən azından Çin enerji daşıyıcılarından asılı bir ölkədir. Ancaq Amerika asılı ölkə deyil. Vaşinqtonun enerji daşıyıcılarının qiymətini aşağı salmaqla benzinin, qazın, elektrik enerjisinin daha çox üstünlük qazanmaq imkanı var. Ona görə də düşünürəm ki, bu, əslində uzunmüddətli bir proses olmayacaq. Bir müddətdən sonra ümumi razılaşmaların şahidi olacayıq. Artıq Amerika bəzi ölkələrlə danışıqlara başlayıb. Amma dünya iqtisadiyyatında bir müddət dalğalı vəziyyət müşahidə olunacaq”.
