Türkiyə-Azərbaycan-Gürcüstan parlamentləri arasında üçtərəfli əməkdaşlıq mexanizmi yaradılacaq.
Bu barədə Türkiyə Böyük Millət Məclisinin (TBMM) sədri Numan Qurtulmuşla gürcüstanlı həmkarı Şalva Papuaşvili arasında Özbəkistanın paytaxtı Daşkənddə keçirilmiş görüşdə razılıq əldə olunub.
Bu istiqamətdə addım atılmalı olduğunu diqqətə çatdıran Qurtulmuş Türkiyənin sözügedən məsələ ilə bağlı ev sahibliyinə hazır olduğunu da bildirib.
Türkiyəli spiker həmçinin Gürcüstanın ərazi bütövlüyünə dəstəyini ifadə edib. O, Gürcüstanın ərazi bütövlüyünü təhdid edən problemlərin aradan qalxmasının regional sabitliyə töhfə verəcəyini qeyd edib.
Milli Məclisin deputatı Bəhruz Məhərrəmov "Sherg.az"a söyləyib ki, Azərbaycan-Türkiyə-Gürcüstan arasında parlamentlərarası birgə əməkdaşlıq platformasının formalaşdırılması əslində digər sahələrdə yüksək səviyyədə olan əlaqələrin inkişafında yeni mərhələ ola bilər:
"Məlumdur ki, hər üç ölkənin Parlamentləri arasında onsuz da kifayət qədər yüksək əlaqələr mövcuddur. Lakin geosiyasi proseslərin gedişatı, həmçinin bölgədə güc nisbətinin dəyişməsi, maraqlar toqquşmasının fərqli müstəviyə meyillənməsi əvvəlki uğurlu əməkdaşlıqlar zəminində yeni konfiqurasiyanı labüd edir. Daşkənddə Azərbaycan-Türkiyə-Gürcüstan Parlamentləri arasında yeni əməkdaşlıq mexanizminin nəzərdən keçirilməsi də ilk növbədə məhz bu zərurətdən irəli gəlib. Təbii ki, belə bir razılaşma bütövlükdə Cənubi Qafqazın təhlükəsizlik arxitekturasına köklü təsir edə, beynəlxalq hüququn ümumtanınmış normlarında əksini tapan prinsiplərə uyğun olaraq hər üç dövlət arasında əməkdaşlığın əhatə dairəsinin genişlənməsinə gətirib çıxara bilər".
Deputat əlavə edib ki, Azərbaycan-Türkiyə-Gürcüstan çoxsaylı beynəlxalq parlement təsisatlarında fəaliyyət göstərirlər:
"Həmçinin dövlətlər arasında yeni və daha təkmil tərəfdaşlıq mexanizmi qlobal müstəvidə hər üç ölkənin maraqlarının daha etibarlı təmini üçün zəmin yarada bilər".
