Kiyevin Rumıniya və Polşada təxribat planları ilə bağlı macar mediasının xəbərləri təsdiqlənərsə, III Dünya Müharibəsi qaçılmaz olacaq.
Teleqraf xəbər verir ki, bunu Rusiya Xarici İşlər Nazirliyinin sözçüsü Mariya Zaxarova bildirib.
Bir sıra Macarıstan KİV-lərində dərc olunan məlumatlara görə, Ukrayna Rusiyanın “Granium” pilotsuz uçan aparatlarından istifadə etməklə Rumıniya və Polşada təxribat planları hazırlayıb.
Zaxarovanın sözlərinə görə, bu, Rusiyanı təxribatda ittiham etmək məqsədilə həyata keçirilib.
"Rusiya ilə NATO arasında müharibəyə səbəb yaratmaq məqsədi ilə təxribatlar hazırlanır”, - Xarici İşlər Nazirliyinin sözçüsü bildirib.
Zaxarova qeyd edib ki, əgər bütün bunlar təsdiqlənərsə, o zaman etiraf etmək lazımdır ki, müasir dövrdə heç vaxt Avropa “üçüncü dünya müharibəsinin başlamasına bu qədər yaxın olmayıb”.
"Pestisracok" portalı Ukrayna kəşfiyyat xidmətlərinin Ukrayna Silahlı Qüvvələrinin iştirakı ilə Rumıniya və Polşada xarici silahların Ukraynaya daşındığı əsas logistika mərkəzlərinə zərbələr endirməyi planlaşdırdığını bildirib.
Macarıstan mediasına görə, hücum “Qərbi Ukrayna ərazisindən Rusiya istehsalı olan dronlardan istifadə edilməklə” həyata keçirilə bilər.
Bu məqsədlər üçün KİV-in məlumatına görə, sentyabrın 16-da Rusiyanın “Granium” pilotsuz təyyarələri artıq Hetman P.Sahaidaçnı Beynəlxalq Mərkəzinin yerləşdiyi Stariçi kəndindəki Yavoriv poliqonuna çatdırılıb.
