Böyrək daşı olanlar hərəkətli həyat tərzi yaşamalıdır
İnsan vaxtlı-vaxtında müayinə olunmadıqda, bu, daşın böyüməsinə şərait yaradır
İnsan vaxtlı-vaxtında müayinə olunmadıqda, bu, daşın böyüməsinə şərait yaradır
Urolitiyaz (urolitiyaz, nefrolitiaz) daş böyrəkdə olarsa və sidiyin sərbəst axmasına mane olmursa, asemptomatik ola bilər.
"Publika.az"ın xəbərinə görə, bu barədə rusiyalı uroloq Andrey Smernitski məlumat verib. "Daş böyrəkdə hərəkət etməyə başlayanda və ya sidik kanalına - böyrəkləri və sidik kisəsini birləşdirən boruya köçəndə canlı simptomlar müşahidə olunur. Sidik axarında ilişib qalan daş sidik axınına mane ola və böyrək kolikasına səbəb ola bilər. Böyrək kolikası qarın, qasıq və cinsiyyət orqanında şüalanma (ağrının yayılması) ilə bel nahiyəsində intensiv paroksismal ağrı kimi özünü göstərən təcili vəziyyətdir. Renal kolik ürəkbulanma, təkrar qusma ilə müşayiət olunur. Kəskin ağrılı, tez-tez sidik ifrazı, sidikdə qan qarışığı olur. Qan təzyiqi yüksəlir", - Andrey Smernitski deyib.
Həkimin sözlərinə görə, bu, təcili tibbi yardım tələb edən son dərəcə təhlükəli bir vəziyyətdir. Uroloq xəbərdarlıq edib ki, böyrək kolikasında ağrılara dözmək olmaz, çünki bu, ağırlaşmaların inkişafı üçün təhlükəlidir.
Uroloq Pərviz Mürsəlov isə qeyd edir ki, insan böyrək daşı xəstəliyi risk qrupuna aiddirsə, ildə 1-2 dəfə müayinə olunmalı və hərəkətli həyat tərzi yaşamalıdır:
" Böyrəkdə əmələ gələn daşlar ilkin mərhələdə heç bir ağrı vermir. İnsan vaxtlı-vaxtında müayinə olunmadıqda, bu, daşın böyüməsinə şərait yaradır. Yaxud da daş böyümədən sidik axarına düşür və dözülməz ağrı ilə insanı təcili şəkildə həkimə müraciət etməyə vadar edir. Əgər böyrəkdəki daş böyüyüb sidik axarına düşə bilməyəcək ölçüyə çatırsa, bu halda böyrəyin daxilini zədələyir və əlavə olaraq iltihabi prosesə səbəb olur. İltihabi proses də öz növbəsində yenidən daşın böyüməsinə zəmin yaradır. Beləliklə, qüsurlu dövran yaranır, daş böyüdükcə iltihab sürətlənir, iltihab sürətləndikcə, daşın böyüməsinə şərait yaranır".
Uroloqun sözlərinə görə, daş xəstəliyinin yaranması günümüzdə tam olaraq bilinməsə də, bir çox genetik səbəblər, anadangəlmə xəstəliklər, qidalanma və maye qəbulu alışqanlığı, coğrafi ərazi, iqlim, irq, peşə kimi faktorların rol oynadığı qəbul edilib. Xüsusilə yetərli miqdarda maye qəbul edilməməsi, cox miqdarda duz istifadəsi, heyvan mənşəli zülalın çox qəbulu, isti mühitdə yaşamaq və işləmək, sidik yolu infeksiyası, bəzi metabolik və genetik xəstəliklər, böyrək anomaliyaları səbəb olur: “Böyrək daşının yaranmasında əsas səbəblər düzgün qidalanmama və kifayət qədər maye qəbul etməməkdir. Daş əmələ gəlməsində sidik yolu infeksiyaları, böyrəkdə olan struktur dəyişikliyi, bəzi dərmanlar və genetik faktorlar da təsir göstərə bilər. Böyrək daşı heç bir əlamət vermədən təsadüfən aşkar oluna bilər. Daş sidik yollarına düşdüyü zaman çox şiddətli tutmaşəkilli, sancışəkilli ağrı verə bilir. Ağrı böyrək bel nahiyəsində, qasıq nahiyəsinə yayılan tipdə olur. Ağrıdan başqa ürəkbulanma, qusma, sidik ifrazı zamanı yanma, göynəmə, sidikdə qan olması, sidiyə çıxma problemləridir”.
