5 gündən çox davam edən yüksək temperatur artıq ağırlaşmadan xəbər verir
“Bu virus və bakteriyalar isti, rütubətli şəraitdə yaşamağı sevirlər, təmiz, soyuq havada isə tez məhv olurlar. Ona görə otağın havasını gün ərzində bir neçə dəfə dəyişmək və uşağı havaya çıxartmaq lazımdır”
Son zamanlarda uşaqlar və böyüklər arasında kəskin virus yayılıb.
Pandemiyadan sonra bu tip virusların sayında artım müşahidə edilir. Bu viruslar əsasən qış aylarında daha çox müşahidə edilir.
Maraqlıdır, görəsən, uşaqlar bu viruslardan necə qoruna bilərlər?
Mövzu ilə bağlı pediatr Qoşqar İsmayılov Lent.az-a açıqlamasında bildirib ki, son iki həftə ərzində yayılan viruslar influenza viruslarıdır.
Onun sözlərinə görə, bu viruslar uşaqlarda və böyüklərdə yüksək hərarət, boğaz ağrısı və angina formasında müşahidə edilir. Bu cür hallarda mütləq şəkildə həkimə müraciət edilməlidir. Həkimin müayinəsindən sonra müalicəyə başlamaq lazımdır. Profilaktiki olaraq təbii ki, sağlam qidalanmaya üstünlük verilməli, yuxu rejimi normallaşdırılmalı və qapalı məkanlarda çox qalmamalıyıq. Əgər bağçada, məktəbdə xəstə olan və ya virusa yoluxan varsa, uşaqları məktəbə və bağçaya göndərməməliyik".
Pediatr Səbinə Abbasquluzadə isə “Şərq”ə açıqlamasında bildirib ki, koronavirusla əlaqədar qapanma dövründə qrip virusunun daha aqressiv ştammları yaranaraq hazırda xəstəliklərin daha ağır keçməsinə səbəb olur:
“COVID-19 pandemiyası dönəmində hamı evə qapandı, steril həyat tərzi keçirdi. Birdən-birə o steril həyatdan yenə əvvəlki həyat rejimimizə dönməyimizlə əlaqədar olaraq tənəffüs yolunun yoluxucu xəstəliklərinə daha çox məruz qalırıq.
Əslində isə qrip virusu və onun törətdiyi xəstəliklər həmişə olub.
Tibbi adı influenza olan qrip virusu tərəfindən törədilən bu xəstəlik hava-damcı yolu ilə yoluxur, yəni xəstə insan danışdıqda, öskürdükdə, asqırdıqda asanlıqla ətrafdakı sağlam şəxsləri yoluxdurur.
Əsas əlamətləri ani başlayan yüksək temperatur, baş ağrısı, boğaz ağrısı, əzələ ağrıları, halsızlıq, uzun sürən öskürək, burun axıntısı, qusma, ishaldır.
5 gündən çox davam edən yüksək temperatur isə artıq ağırlaşmadan xəbər verir.
Kəskin otit, pnevmoniya, inaq, febril qıcolma, ensefalit kimi təhlükələrə yol açır”.
Xəstəlikdən sağalmamış, ya da sağalandan qısa müddət sonra təkrar yoluxma səbəblərinə gəldikdə isə pediatr bunun havasızlıqdan olduğunu deyib:
“Virus və bakteriyalar isti, rütubətli şəraitdə yaşamağı sevirlər, təmiz, soyuq havada isə tez məhv olurlar. Ona görə otağın havasını gün ərzində bir neçə dəfə dəyişmək və uşağı havaya çıxartmaq lazımdır. Otağın temperaturunu 22 dərəcədə saxlamaq lazımdır”.
S.Abbasquluzadə həmçinin qeyd edib ki, qətiyyən həkim məsləhəti olmadan özbaşına antibiotik müalicəsinə başlamaq olmaz.
Çünki bu, virus infeksiyasıdır, antibiotik isə bakterial infeksiya zamanı verilir. Antibiotik o zaman verilə bilər ki, bakterial ağırlaşma olsun: “Həkim məsləhəti olmadan özbaşına antibiotik vermək olmaz, onun dozası dərmanın içlik vərəqəsindəki kimi deyil, həkim tərəfindən xəstəliyin gedişatı və uşağın çəkisinə görə hesablanır.
Yersiz verilən antibiotiklərə qarşı uşaqda davamlılıq yaranır və növbəti dəfə xəstələnəndə artıq o antibiotik kömək etmir və ondan “güclüsünü” yazmaq məcburiyyətində qalırıq”.
