Azərbaycan BMT qarşısında məsələ qaldırmalıdır

Fransa Korsikada beynəlxalq hüquqları və konvensiyaları pozur

  Milli Məclisin dünənki iclasında Fransanın Azərbaycana qarşı qərəzli mövqeyi, həmçinin Korsika məsələsi də müzakirə edilib. Deputatlar Fransanın Korsika əhalisinin hüquqlarını tapdalamasını pisləyiblər. 
  Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov deyib ki, Azərbaycana dərs keçmək istəyən Fransa özü bu dəyərləri öz daxilində pozur: “Fransa bu gün Korsikada tamamilə insanlığa qarşı siyasət aparır. Orada insanlar öz dillərində danışmaq istəyirlər. Buna cavab olaraq Fransa silah gücünə o insanları öldürür, polis vasitəsilə ağlasığmaz işgəncələr verir. Onlar öz siyasi opponentlərini həbsxanalarda öldürtdürürlər. Fransanın Azərbaycanda separatçı qüvvələri dəstəkləmək haqqı yoxdur. Bu gün Fransanı Korsikada insan haqlarını qorumağa çağırırıq. Bu məsələni BMT-də də qaldırmaq lazımdır. Çünki Fransa BMT TŞ-də daimi üzvdür. Artıq Azərbaycan fərqli Azərbaycandır. Biz görürdük ki, ikili standartlarla, subyektiv yanaşmalarla Azərbaycana qarşı hansı iddialar irəli sürülürdü. Bu gün isə öz ərazi bütövlüyünü bərpa etmiş, güclü, dünyaya lazım olan Azərbaycan var. Fransa bilməlidir ki, bu qeyri-qanuni addımlara öz səsimizi qaldıracağıq”.
  Deputat Musa Qasımlı da deyib ki, bu gün BMT TŞ-nin daimi üzvü olan Fransanın demokratiyadan, insan haqlarından danışmağa qətiyyən haqqı yoxdur: “Fransanın bütün tarixi göz yaşları, müstəmləkəçilik tarixidir. Bunlardan biri də Korsikadır. Korsikada insanlar sadəcə dil, mədəniyyət istəyirlər. Fransa beynəlxalq hüquqları və konvensiyaları pozur, Korsika xalqının hüquqlarını tanımır, eyni zamanda Ermənistanda terroru müdafiə edir. Ona görə də Fransanı bütün beynəlxalq təşkilatlarda qınamalıyıq”.
  Deputat Elman Nəsirov qeyd edib ki, Fransa yenidən müstəmləkəçilik libasına bürünüb, korsikalıların səsini boğmaqdadır: “Fransanın Korsikada illərdir törətdiyi cinayətlərə görə cəzasız qalması Makronda arxayınlıq yaradıb. Fransa üçün yaxşı və pis terrorçu bölgüsü var. Qarabağda Araik Arutyunyan “yaxşı terrorçu” hesab olunur, dəstək alır, amma Korsikada isə “pis terrorçular” həbsxanalara atılır. Bu, ikili standartların ən bariz nümunəsidir. Fransa və Ermənistan liderləri bir-birinə bacı deyirlər. Belə davam etsə, beynəlxalq siyasətin tükənməkdə olan abır-həyası qalmayacaq. Fransa Korsikaya qarşı tətbiq etdiyi repressiya siyasətinə son qoymalıdır. Avropa Şurası Parlament Assambleyası Korsikaya Fransanın törətdiyi cinayətləri araşdırmaq üçün faktaraşdırıcı missiya göndərməli, insanlıq əleyhinə cinayətlərə qiymət verməlidir”.
  Deputat Tural Gəncəliyev deyib ki, Fransa, Yunanıstan və Ermənistana yaxın olan ölkələr Azərbaycana qarşı hansı mövqeyi tuturlar: "Həmişə Avropa Parlamentində Azərbaycana qarşı qərəzli mövqe tutan deputatlar Ermənistandan aldıqları pul müqabilində Azərbaycan əleyhinə sənədlər qəbul edib, danışıblar: “Son günlər Avropa Parlamentində açığa çıxan korrupsiya faktları da ondan xəbər verir ki, erməni iş adamları Avropa Parlamentinin binasında oturub Avropa deputatlarını pul müqabilində Azərbaycana qarşı işə cəlb edirlər. Əgər Qərbin liberal dəyərləri dedikdə korrupsioner mexanizmi nəzərdə tuturlarsa, biz bunu rədd edirik. Onların gözündə Ermənistanda olan aksiyalar başqa, azərbaycanlı ekofəalların keçirdiyi aksiyalar başqa görünürsə, biz bunu rədd edirik”.