Rusiya Prezidentinin səfər edə biləcəyi az dövlətlərdən biri Türkiyədir
“Ərdoğan Putinə Ankaradakı görüşündə “iki ildən sonra Qarabağı tərk etməyinizi gözləyirik” cümləsini təkrarlayacaq”
Türkiyə Prezidenti Rəcəb Tayyib Ərdoğan rusiyalı həmkarı Vladimir Putinlə telefon danışığında onu ölkəsinə səfərə dəvət edib. Daha sonra bununla bağlı açıqlama verən Ərdoğan bildirib ki, Rusiya Prezidenti avqust ayında Türkiyəyə səfər edəcək. Türkiyə liderinin sözlərinə görə, səfərin dəqiq tarixi hələ ki müəyyənləşməyib. Ərdoğan deyib ki, Türkiyə və Rusiyanın "Taxıl sazişi" ilə bağlı eyni mövqedən çıxış edirlər. Ekspertlərin fikrincə, Ərdoğanın səylərinə baxmayaraq, Putin “Taxıl sazişi”ni uzatmaq istəmir. Hətta iddia olunur ki, Putin Türkiyəyə səfərə razılaşsa belə, “Taxıl sazişi” məsələsində geri addım atmayacaq. Lakin buna baxmayaraq, Türkiyəyə səfər Putin üçün əhəmiyyətli ola bilər.
"Atlas" Araşdırmalar Mərkəzinin rəhbəri Elxan Şahinoğlu "Sherg.az"a deyib ki, Ukrayna müharibəsinə və sanksiyalara görə Putinin səfər edə biləcəyi dövlətlərin sayı çox deyil. Ekspert vurğulayıb ki, Putin hara getsə, Beynəlxalq Cinayət Məhkəməsinin həbsi kabusu ilə üzləşəcək: "Putin bu səbəbə görə avqust ayında BRİKS-in (Braziliya, Rusiya, Hindistan, Çənubi Afrika Respublikası və Çin) Cənubi Afrika Respublikasındakı (CAR) toplantısına qatıla bilməyəcək. Çünki Putin bu ölkəyə getsə, Beynəlxalq Cinayət Məhkəməsinin sənədlərinə imza atan CAR Putini həbs etməlidir. Doğrudur, CAR rəhbərliyi belə bir riskə getməz və ona görə də Putinə mesaj göndəriblər ki, “toplantıya Kremldən internet vasitəsilə qatılmağınızı məsləhət bilirik”. Türkiyə Beynəlxalq Cinayət Məhkəməsinin sənədlərinə qoşulmadığına görə Putinin bu ölkədə həbs riski yoxdur. Putinin NATO ölkəsi olan Türkiyəyə səfəri Kreml sahibinin beynəlxalq aləmin mühasirəsində olmadığı anlamına xidmət edə bilər. Putin bu səbəbdən Türkiyəyə səfərlə əlinə düşən fürsətdən istifadə etmək istəyər".
Analitik vurğulayıb ki, Putinin Türkiyəyə mümkün səfəri Azərbaycan üçün də əhəmiyyətlidir: "Rəcəb Tayyib Ərdoğan NATO-nun son Vilnüs zirvə toplantısında “Putinin 9 noyabr bəyanatına sadiq qalacağını və 2 ildən sonra Rusiya hərbi kontingentini Qarabağdan çıxaracağına inanırıq” açıqlamasını vermişdi. Ərdoğan Putinə Ankaradakı görüşündə “iki ildən sonra Qarabağı tərk etməyinizi gözləyirik” cümləsini təkrarlayacaq. Əlbəttə, Putin Rusiya hərbi kontingentini iki ildən sonra da Azərbaycan ərazisində - Qarabağda saxlamağa çalışacaq. Ancaq Putin bunu etməyə çalışarkən Ərdoğanın ona Qarabağla bağlı hər dəfə xatırlatdığı fikirləri qulaqradına vura bilməyəcək. Vacibdir ki, bu məsələdə Bakı ilə Ankara koordinasiyalı hərəkət etsinlər".
